Облыс өңіріндегі балалар үйлерінде тәрбиеленіп жатқан жеткіншектерге ат ізін салатындар, оларға мереке сайын сыйлықтар немесе басқаша көмегін беретіндер баршылық. Үкіметтік емес ұйымдар да балалар үйлерімен белсене жұмыс істейді. Сонда «тірі жетімдердің басына түскен тағдыр тәлкегін қалай жеңілдетуге болады?» деген сауал барлық жұмыстың нысанасына айналады. Жақында Рудный қаласындағы балалар үйінде қамқоршылар күнін ұйымдастырған «Нұр Отан» партиясы облыстық филиалының «Жас Отан» жастар қанаты да осындай мақсатты алға салды.
Балалар үйінде жұмыс үш бағытта жүргізілді. Психологтар тобы қамқоршылар мен жетімді жебегісі келетіндер үшін, балалар үйінен қамқорлығына бала алғысы келген азаматтар үшін семинар-тренинг өткізді. Екінші топ балалар үйінің тәрбиеленушілерімен әскери-патриоттық тәрбие жөнінде әңгіме өткізсе, үшінші топ жұмысын осындағы жасөспірімдерді волонтерлық және қоғамдық жұмыстарға баулу мәселесіне арнады.
Балалар үйіндегі жасөспірімдерге Ауған соғысының ардагері Мұратбек Жұбанышевпен кездесу қызықты болды. Ол балаларға Ауған жеріндегі қиын күндерден әңгімелер айтып берді. Олар шет жерде от пен оқтың арасында жүріп, бейбіт ауған халқына көмектесті, мектептер мен ауруханалар салды. Балалардың түрлі сұрақтарына жауап берген Мұратбек оларға еліміздің әрбір азаматы Отанға қызмет етуі, өз елінің патриоты болуы керектігін айтты. Отан үшін қандай қызметке де әрқашан дайын болуы керектігін түсіндірді.
– Әскер қызметі жеңіл емес және үлкен жауапкершілікті қажет етеді. Отанға қызмет ету – парыз. Әскери қызметті жүрекпен қалап, саналы түрде барғанда, адал қызмет еткенде ғана еліңнің, Отаныңның нағыз патриоты боласың. Менің сүрлеуіммен жүргісі келетін жастарға бұл істе шыдамдылық, табандылық, қайсарлық болғанда ғана еліңнің қорғаны бола алатыныңды айтқым келеді, – деді Мұратбек Жұбанышев.
Облыстағы «Жас Отан» жастар қанатының төрағасы Ерлан Төлетаевтың балалар үйіндегі жасөспірімдермен жүргізген әңгімесі сырласу кешіне ұласты. Ол тәрбиеленушілерге балалықтың өтетінін, енді үлкен мұраттар үшін алға ұмтылу қажеттігін түсіндірді. Өмірде өз жолын табамын деген жастарға мүмкіндіктің көп екенін, оның жолдарын айтты. Ең алдымен, әр жасөспірімнің алдында мамандық таңдау мақсаты тұр.
– Балалар үйіндегі жасөспірімдермен бауырыңа тарта араласқанда ғана олар шешіледі, жүректегі мұзы ерігендей әсер аласың. Мен әңгімелескен балалардың көбі болашақ мамандығын таңдапты. Алда олар оқуға түссе еңбек нарығында бәсекеге қабілетті маман болып шығады. Оларды тек балалар үйінде ғана емес, одан кеткен соң да бақылап, жақсы ортаға түсуін қадағалау керек. Сонда түзу жолын тауып кеткен жетім балалардың тағдыры да жеңілдейді, – дейді Ерлан Төлетаев.
«Жас Отан» жастар қанаты белсенділерінің айтуынша, жетім балаларды қамқорлыққа алған отбасылармен, балалардың өз ата-анасымен рухани-адамгершілік тұрғысында көп жұмыс істеуі керек. Жетім балаларға адамдар тарапынан, айналасынан барынша шуақ мол түскенде ғана, жазықсыз жәудіркөздердің басына түскен хал жеңілдейді. Ең бастысы, оларды жаман жолдан сақтаймыз.
Нәзира ЖӘРІМБЕТОВА
«Егемен Қазақстан»
Қостанай облысы,
Рудный қаласы
1649 рет оқылды
