11 сәу, 2022 сағат 11:38

Түркістан облысында 10 миллион теңгенің киімін ұрлаған күдікті ұсталды

Күдікті қылмыс үстінде қолға түсті. Ол ізін жасыру үшін дүкендегі бейнебақылау камераларын өшіріп отырған, деп хабарлайды ҚазАқпарат.

Сайрам аудандық полиция бөліміне арызданған жергілікті тұрғын киім-кешек дүкенінен тауарларының ұрланғандығын көрсеткен. Жәбірленушіге келтірілген шығын көлемі шамамен 10 миллион теңгені құраған. Аталған жайтты полиция қызметкерлері ҚР ҚК-нің 188-бабы «Ұрлық» бойынша тіркеуге алды.

«Жедел уәкілдер шұғыл іздестіру іс-шаралары кезінде күдіктінің қайта қылмыс жасауға келуі мүмкін екенін алға тартып, оны құрықтауға арнайы жоспар құрды. Нәтижесінде түнгі уақытта сайрамдық сақшылар күдіктіні қылмыс үстінде ұстады. Ол қойма ішінен киім-кешекті заңсыз алып шығып, көлігімен әкетіп бара жатқан жолда қолға түсті» - делінген Түркістан облысы полиция департаменті таратқан хабарламада.

Күдікті жәбірленушінің жүк тасумен айналысатын жұмысшысы болып шыққан. Ол ұрлық қылмысын бұдан бұрын да 3 рет жасапты. Бірінші рет жарық сөнген уақытта бейнебақылау камералары істеймейтінін пайдаланып, 2 қап киім-кешекті алып кеткен. Ал қалған кездері бейнекамераны өшіріп қойып, жоспарын жүзеге асырып жүріпті. Ұрлаған жаңа киімдерді Шымкентте 3 миллион теңгеге сатып, ақшаны өз қажеттілігіне жұмсаған.