07 шіл, 2021 сағат 01:16

Талдықорғанда «Нұр-Сұлтан – келісім мен бейбітшілік астанасы» атты облыстық форум өтті

Алматы облысының орталығы Талдықорған қаласында «Қоғамдық келісім» КММ-нің қолдауымен Алматы облыстық «Күміс тамыр» қытай этномәдени бірлестігі ұйымдастыруымен Нұр-Сұлтан – келісім мен бейбітшілік астанасы» атты облыстық форумы өтті, - деп хабарлайды «Ұлт ақпарат».

Қоғамдық келісім» КММ директорының міндетін атқарушы Жандос Байкамитов аталған шара Қазақстан Республикасы Тәуелсіздігінің 30 жылдығы аясында астана күніне арналғанын атап өтті.

«Баршаңызға белгілі 6-шілде Нұр-Сұлтан қаласының құрылған күні, яғни бас қаламыздың туған күні. Жас та болса, бас болып, елімізді әлемге танытып отырған Елордамыз күн санап көркейіп келеді. Осы орайда бүгінгі Астана күніне орай ұйымдастырылып отырған форумға қатысушыларды салтанатты шараның ашылуымен құттықтаймын. Еліміздің бірлігі ұлттардың татулығында, келісім мен бейбітшілігінде дегім келеді», - деді «Қоғамдық келісім» КММ директорының міндетін атқарушы Жандос Байкамитов.

Сонымен бірге, аталған форум аясында қытай этномәдени бірлестігі талантты жасөспірімдер мен жастарға қолдау көрсетіп, өскелең ұрпақты эстетикалық және адамгершілік-патриоттық сезімін тәрбиелеу мақсатында онлайн байқау ұйымдастырды.

«Бұл байқау үш номинациядан, атап айтқанда, ән, авторлық өлең, мәнерлеп оқу және патриоттық тақырыпта сурет салу бойынша өтті. Байқауға Алматы облысының барлық аймақтарынан түрлі этностың балалары мен жасөспірімдері қатысты. Сондай-ақ, жеңімпаздар дипломдармен және бағалы сыйлықтармен марапатталды», - деді «Күміс тамыр» қытай этномәдени бірлестігінің төрағасы Людмила Мазова.

Байқау қорытындысы бойынша, «Ән» номинациясында бірінші орынды Талдықорған қаласынан қатысушы Аруна Балабекова, «авторлық өлең» номинациясында Лиана Султанова, «Бейнелеу өнері» номинациясында Диана Мигачева жеңіске жеткен.

«Мен «авторлық өлең» номинациясы бойынша қатыстым. Өзімді жүлде аламын деп ойлағам жоқ, дегенмен жарысқа қатысушы әр адам жеңілемін деп қатыспайтыны тағы бар. Мен Елордамыздың туған күніне арнап шығарған жыр шумақтарымды жіберген болатынмын. Қашықтан онлайн ұйымдастырған бұл байқаудың әділ өткеніне күмәнім жоқ. Себебі, бір-ақ күннің ішінде жеңімпаз болып шығамын деп өзім де ойлаған жоқпын. Барлық жеңімпаздарды шын жүректен құттықтап, ұйымдастырушыларға зор алғысымды білдіремін», - деді «авторлық өлең» номинациясында бірінші орын алған қатысушы Лиана Султанова.

«Ән» номинациясында бірінші орынды алған Талдықорған қаласынан қатысушы Аруна Балабекова онлайн ән салудың қызықтарымен бөлісті.

«Байқау ұйымдастырылып жатқанын естігенде, алдымен, қызық көрінді. Өзің ән айтып, оны виеоға түсіріп, ұйымдастырушыларға жолдауың керек. Одан талантың көріне ме, жоқ па белгісіз. Бірақ шын талантты танитын әділ қазылар болса, бәрі де әділ өтеді екен. Мен ән салғанды бала кезімнен жақсы көремін. Осы байқауға ән салып, жолдағанмын. Жүлделі болуым мені қанаттандырып отыр, енді алдағы уақытта өнерден алыстамасам деймін. Осындай карантин жағдайында талабымызды тұншықтырмай осындай онлайн байқаулар қашықтан ұйымдастырыла берсе деймін. Бұл біз үшін үлкен тәжірибе», - деді «Ән» номинациясында бірінші орынды алған Талдықорған қаласынан қатысушы Аруна Балабекова.

Сондай-ақ, аталған облыстық форумға «Полония» поляк этномәдени бірлестігінің төрағасы Елена Порсева, «Барбанг» күрдтер қауымдастығының Талдықорған өңірлік филиалының төрағасы Али Момуч-оглы, «Вайнах» шешен-ингуш этномәдени бірлестігі төрағасының орынбасары Асет Ибрагимова, «Элефтерия» грек этномәдени бірлестігі төрағасының орынбасары Галина Путахиди қатысып, сөз сөйледі. Форум Талдықорған қаласының шығармашылық ұжымдарының қатысуымен концерттік бағдарламамен аяқталды.

Естеріңізге сала кетейік, Алматы облысының орталығы Талдықорған қаласында «Қоғамдық келісім» КММ-нің қолдауымен Алматы облыстық «Күміс тамыр» қытай этномәдени бірлестігі ұйымдастыруымен Нұр-Сұлтан – келісім мен бейбітшілік астанасы» атты облыстық форумы өтті. Форум аясында қытай этномәдени бірлестігі талантты жасөспірімдер мен жастарға қолдау көрсетіп, өскелең ұрпақты эстетикалық және адамгершілік-патриоттық сезімін тәрбиелеу мақсатында онлайн байқау ұйымдастырылған болатын.