Қазақстанның агроөнеркәсіптік кешенді дамытуға арналған мемлекеттік бағдарламасы аясында субсидия алушылар саны 7 есеге дейін көбейеді. Бұл туралы Үкімет отырысында ҚР Ауыл шаруашылығы министрі Асқар Мырзаxметов айтты, деп хабарлайды "Ұлт ақпарат" Baq.kz порталына сілтеме жасап.
«Бағдарлама барысында субсидия алушылар саны 7 есеге дейін көбейіп, «ҚазАгро» арқылы жеңілдікпен алатындар саны артып, несие алатын орта және шағын кәсіпкерлікті қолдау 1,4 есеге ұлғаяды. 1 теңге бойынша субсидиялау 2 есеге дейін, яғни 7,5 теңгеден 13 теңгеге дейін көбейеді. Бұл жалпы өнім өндіру үлесі 50%-ға артады деген сөз. Жеңілдікпен несие берудегі негізгі мақсат – өңдеуші кәсіпорындардың үлесін көбейту. Ал инвестициялық субсидия арқылы қымбат емес ауыл шаруашылығы техникаларын сатып алу қарқынын 1,5-2 есеге дейін ұлғайту көзделіп отыр», дейді Асқар Мырзаxметов.
Министр, сондай-ақ, жаңа бағдарлама аясында егіс алқаптарын әртараптандыру жалғастырылатынын айтты.
«Бидай алқаптары 2,3 млн. гектарға (2016 жылы 12,4 млн га-дан 2021 жылы 10,1 млн. гектарға ) қысқартылады. Босаған алқаптарға экспортқа сұранысы жоғары арпа, сұлы, жүгері және майлы дақылдар егіледі. Біздің тарапымыздан егіс алқаптары өңірлер мен дақылдар бойынша есептелді. АӨК-ті дамыту үшін, жаңа бағдарламада көрсетілген тапсырмаларды сәтті орындау үшін ғылым және білім салаларын дамытудың ықпалын өзгерту мәселесі де қарастырылып жатыр. Ғылымды біріктіру мен білімді дамыту салаларына баса назар аударылуда. Ауыл шаруашылығы өндірісінің сұранысына жауап беретін зерттеулермен айналысу қажет. Сондықтан, ғылым тауар өндірушілердің нақты сұранысына байланысты қаржыландырылады», - дейді ол.
1896 рет оқылды_140_110.webp)
