Сурет: Глубокое және Шемонаиха аудандары әкімдіктері
Шығыс Қазақстан облысының барлық 11 ауданы "жеке уақытқа" көшті, - деп хабарлайды Ult.kz Tengrinews.kz-ке сілтеме жасап.
13 наурыздан бастап Шемонаиха және Глубокое аудандарындағы мемлекеттік мекемелер, кәсіпорындар мен әлеуметтік қызметтер қызметкерлері сағат 8:00-де жұмысқа келіп, 17:30-да аяқтайды. Түскі үзіліс уақыты 12:00-13:30 аралығында белгіленген.
Бұл өзгерістер мектептер, балабақшалар және медициналық ұйымдарға әсер етпейді, өйткені олар бұрыннан осыған ұқсас жұмыс кестесімен қызмет етіп келген.
Шемонаиха ауданы әкімдігінің мәліметінше, жаңа жұмыс уақыты еңбек процесін оңтайландыру және аудандар арасындағы өзара байланысты жақсарту мақсатында енгізілген. Сонымен қатар, өзгерістер аймақтың табиғи ерекшеліктеріне – ерте таң атып, күннің ерте батуына байланысты қабылданған.
"Жаңа жұмыс тәртібі күндізгі уақытты барынша тиімді пайдалануға мүмкіндік беріп, еңбек өнімділігін арттыруға және тұрғындардың өмір сүру сапасын жақсартуға ықпал етеді", – деді аудан әкімі Дидар Кеңесбаев.
Глубокое ауданында жергілікті тұрғындармен кездесу өткізіліп, жаңа жұмыс кестесі талқыланды.
"Қызметкерлердің отбасына көбірек уақыт бөлуіне жағдай жасау – басты мақсатымыз. Біз халықпен ақылдасып, мұндай жұмыс кестесі еңбек және тұрмыс жағдайын жақсартатынына сенімдіміз", – деді аудан әкімі Эльдар Тумашинов.
Жергілікті тұрғындар да бұл бастаманы қолдады.
"Кешкі уақытта бос уақыттың көбеюі – отбасыға көңіл бөлуге, үй шаруасына көбірек уақыт бөлуге мүмкіндік береді", – дейді Глубокое ауданының тұрғыны Роза Адильбаева.
Айта кетейік, 29 ақпаннан 1 наурызға қараған түні Қазақстан бірыңғай уақыт белдеуіне өтті. Алайда 7 маусымда уақытты қайта өзгертуге қатысты петиция басталып, 50 мыңнан астам қол жиналғанымен, ол қабылданбады.
2025 жылдың қаңтарынан бастап Шығыс Қазақстан облысының бірнеше ауданы жаңа жұмыс уақытына көшті.
5 қаңтардан бастап Катонқарағай ауданының 17 ауылы, 24 ақпанда – Марқакөл мен Үлкен Нарын аудандары, 5 наурызда – Зайсан, Күршім, Тарбағатай және Самар аудандары, 12 наурызда – Алтай мен Ұлан аудандары жаңа кестемен жұмыс істей бастады. Бұл аудандарда жұмыс күні 08:00-де басталып, 17:30-да аяқталады. Түскі үзіліс – 12:00-13:30 аралығында белгіленген.
275 рет оқылды
