Фото: видеодан кадр
Абай облысының кәмелетке толмағандар істері жөніндегі мамандандырылған ауданаралық соты Семейдегі алтыншы сынып оқушысын ұрып-соққан жасөспірімдерге қатысты істі қарады, деп хабарлайды Ult.kz.
Оқиға барысы
Сотта анықталғандай, кәмелетке толмаған екі бала жәбірленушіні өз үйінің ауласында тосып алып, жанжал шығарған. Кейін тағы бірнеше жасөспірім келіп, жәбірленушіні жылу қазандығына апарып, соққыға жыққан. Олардың әрекетін басқа жасөспірімдер видеоға түсірген.
Сот шешімі
- Екі ұл 11 жасқа толмағандықтан, оларды заңға сәйкес арнайы мектепке жіберу мүмкін болмады.
- Видеоны түсірген 12 жастағы қыздың құқық бұзушылық жасамағаны, сабақты жақсы оқитыны және арнайы есепте тұрмағаны анықталды. Ол және екі ұл ювеналды полицияның арнайы есебіне алынды.
- Ал 13 және 16 жастағы екі қыз төрт ай мерзімге девиантты мінез-құлықты балаларға арналған мектепке жіберілді. Олардың бұған дейін де заң бұзып, ішімдік ішкені және қоғамдық тәртіпті бұзғаны анықталды.
- 13 жастағы ұл ерекше режимдегі мектепке алты айға жіберілді. Ол соңғы екі айда екі рет қылмыстық құқық бұзушылық жасаған.
Сот үкімі бойынша арнайы мектептегі мерзім қажет болған жағдайда ұзартылуы мүмкін.
Сот шешімі әлі заңды күшіне енген жоқ.
Еске салайық, бұған дейін Семейде жасөспірімдердің алтыншы сынып оқушысын соққыға жыққаны туралы жазғанбыз.
2955 рет оқылды
