02 жел, 2021 сағат 15:42

БҚО-да мас полицей жол апатына ұшырап, адам өліміне себепші болды

Теректі ауданы полиция бөлімі бастығының орынбасары жол апатына себепші болды. Оқиға орнында бір адам қайтыс болды, тағы екеуі жарақат алды. Полицей рөлге мас күйінде отырған, деп хабарлайды Sputnik Қазақстан агенттігі "Мой город" порталына сілтеме жасап.

Ресми мәліметке сәйкес, жол апаты 1 желтоқсан күні кешкі сағат 19:00-дің шамасында болған. Орал-Тасқала жолының 46-шы шақырымында Lada Largus пен Hyundai Accent бетпе-бет соқтығысты. Біреуін Теректі ауданына қарайтын ауылдық полиция бөлімі бастығының орынбасары жүргізген.

Жол апаты кезінде бір адам оқиға орнында көз жұмды. Бұдан бөлек, тағы екі адам жарақат алды.

"Бұл – шектен шыққан оқиған. Біз марқұмның жақындарына және туған-туыстарына үлкен өкінішпен көңіл айтамыз. Қазіргі кезде қызметтік тергеу шаралары басталды. Басшыларға қатысты тәртіптік жаза қолданылады. Ал жол оқиғасын жасаған қызметкер ішкі істер органдарынан шығарылады", - дейді облыстық полиция департаменті бастығының орынбасары Нұрлан Рамазанов.

Оның айтуынша, дәл қазір Қылмыстық-процессуалдық кодекстің 201-бабы бойынша оқиғаның мән-жайын жариялауға болмайды. Алайда полиция департаменті күдіктінің ішкі істер органдарында 20 жыл істеп жүргеніне қарамастан, заң бойынша барлық шараны қолданады.

Қазіргі кезде рөлге мас күйінде отырған полицей қамауға алынды.