Павлодарда жол апатынан екі көліктің жолаушысы мен өтіп бара жатқан адам зардап шекті, деп хабарлайды ҚазАқпарат.
Қалада екі жеңіл көлік соқтығысып, біреуі жер үйдің қоршауын бұзып өткен.
«Сағат 08:40-та Павлодар қаласында «ВАЗ-2110» маркалы автокөліктің 21 жастағы жүргізушісі Горький көшесінің бойында келе жатып, Абай-Горький көшелерінің қиылысында «Жол бер» деген жол белгісінің талаптарын орындамастан, «Honda» көлігімен соқтығысқан. Соққыдан «ВАЗ» жеке үйдің қоршауына соғылып, ол өтіп бара жатқан жолаушыға құлаған», - деді Павлодар облысы Полиция департаментінен.
Құқық қорғау органдарының мәліметінше, жол-көлік оқиғасынан өтіп бара жатқан адам жарақат алып, ауруханаға жеткізілген. «Honda» автокөлігінің екі жолаушысы, атап айтқанда, жүргізушінің әйелі мен қызы медициналық көмекке жүгінді.
«ВАЗ-2110» автокөлігі айып тұрағына орналастырылды. Тексеру жүргізіліп, сараптама тағайындалды», - деп атап өтті ведомстводан.
818 рет оқылды
