03 шіл, 2021 сағат 15:53

Павлодарда вакцина алмаған қызмет көрсету саласындағыларға айыппұл салынады

Павлодар облысында вакцина алмаған қызмет көрсету ұйымдары мен жұмыскерлеріне айыппұл салынады, деп хабарлайды Pavlodarnewskz.

Бұл туралы онлайн өткен баспасөз жиынында Павлодар облысының санитарлық-эпидемиологиялық бақылау департаментінің басшысы Батырбек Әлиев мәлім етті.

- КВИ-дің одан әрі таралуының алдын алу үшін 1 шілдедеден бастап еліміздің Бас санитарлық дәрігерінің қаулысы шықты. Қаулы бойынша қызмет көрсету саласыдағылар вакцина қабылдауға міндеттелді. 15 шілдеге дейін вакцинаның 1-компонентімен, 15 тамызға дейін 2-компонентімен егілуі тиіс, - деді Батырбек Әлиев.

Айта кетейік, еліміздің Бас санитарлық дәрігерінің қаулысына сәйкес ХҚКО, сауда үйлері және өзге де қызмет көрсету саласы ұйымдарының қызметкерлеріне вакцина егілу міндеттелді. Өйткені, бұл саланың мамандары адамдармен жиі байланысқа шығады.

Вакцина егілуден қарсы көрсеткіштері бар және соңғы 3 айда КВИ-мен ауырғандар босатылады.

- Вакцина қабылдамағандарға айыппұл салынады. Бұл әкімшілік құқық бұзушылық кодексі бойынша қарастырылады. Жеке адамдарға 5 айлық есептік көрсеткіш мөлшерінде, ал, ұйымдарға салынатын айыппұл 500 АЕК мөлшеріне дейін жетеді, - деді Батырбек Әлиев.

Қызметкерлердің вакцина қабылдауы бойынша әр ұйымның қызметкерлерді басқару бөлімі есеп жүргізеді.

- Біз қай ұйымда қанша адам жұмыс жасайтынын білмейміз. Сондықтан облыста қызмет көрсету саласының қанша адамы егілу керектігі белгісіз. Бірақ өңірде күніне 3000-3500 адам КВИ-ге қарсы вакцина егілуі тиіс деген талап бар. Кешегі күні 4 мыңнан астам адам вакцина алды, - деді Батырбек Әлиев.

Облыстың бас санитарлық дәрігерінің айтуынша, қызмет көрсету саласының мекемелеріндегі вакциналауға байланысты мониторинг топтары тексеру жүргізуі мүмкін.