Өскемен қаласында өртенген көпқабатты үйден 40 адам эвакуацияланды, деп хабарлайды "Ұлт ақпарат".
ШҚО Төтенше жағдайлар департаменті баспасөз қызметінің мәліметіне сүйенсек, 23 желтоқсан күні сағат 14.28-де Қазақстан көшесіндегі 12 қабатты тұрғын үйде өрт шыққаны туралы хабар түскен. Оқиға орнына келіп жеткен өрт сөндірушілер электр кабелін және 2-8 қабаттар аралығындағы электр есептегіштерді жалын шарпығанын көрді.
«Құтқарушылар келгенше электр қуатын өздігінен өшірмек болған 1988 жылғы ер адамның қолын күйік шалды. Ол бірден ауруханаға жеткізілді. Сондай-ақ 6 тұрғын, оның ішінде 4 бала құтқарылған», - деп хабарлады ведомство өкілдері.
Бұдан бөлек, түтін тұмшалаған подъезден 40 адам эвакуацияланды. Тілсіз жауды ауыздықтауға жеке құрамнан 35 адам мен 9 техника жұмылдырылған. Қазіргі уақытта өрттің шығу себебі анықталып жатыр.
