Парламент Сенатында Біріккен Ұлттар Ұйымында 2030 жылға дейінгі Жаһандық күн тәртібі ретінде қабылданған Орнықты даму мақсаттары (ОДМ) таныстырылды. БҰҰ-ға қатысушы мемлекеттер 2015 жылғы қыркүйекте қабылдаған 17 мақсат кедейлікті жоюға, жер жүзіндегі ресурстарды сақтауға және баршаның теңдігі мен игілігін қамтамасыз етуге бағытталып отыр.
Орнықты даму мақсаттарын іске асыруды дамытуға арналған кешенді қадамдарды, кедейлік пен теңсіздіктің түпкі себептерін жоюды көздейді. Осы орайда, шараны аша келіп, Сенаттың Халықаралық қатынастар, қорғаныс және қауіпсіздік комитетінің төрайымы Дариға Назарбаева Орнықты даму мақсаттарының бәрі қамтылатынын және өршіл бағдарламаларын іске асыруда ұлттық үкіметтерге негізгі жауапкершілік жүктелетінін атап өтті.
Сенатордың айтуынша, біздің еліміз БҰҰ бастамаларын іске асыруға белсенді қатысып келеді және 2017 жылы БҰҰ Қауіпсіздік Кеңесінің Тұрақты емес мүшесі болу құрметіне ие болды. Біздің елімізде қабылданған ұлттық стратегиялық құжаттар мен салалық мемлекеттік бағдарламалар Орнықты даму мақсаттарына үндес болып отыр. Бес институттық реформаны іске асыру жөніндегі «100 нақты қадам» Ұлт жоспары Орнықты даму мақсаттарын табысты жүзеге асыруға елеулі тетіктер ұсынады», деп атап өтті Д.Назарбаева.
Оның сөзінде алдағы «Болашақтың энергиясы» тақырыбымен Астанада өтетін ЭКСПО-2017 халықаралық көрмесінде экологиялық мақсаттарды ілгерілетудің маңызды рөлі атап өтілді. «Біздің республикамыздың жетістіктері және жаңа міндеттер қою деңгейі Елбасының Қазақстанды дамытудағы алысты болжаған стратегиялық ойларын көрсетеді. Қазіргі замандағы Қазақстан Орнықты даму мақсаттарына қол жеткізуде көшбасшы болуға дайын және аймақтағы елдер үшін өнеге ретінде қызмет етеді», деді Д.Назарбаева.
БҰҰ Даму бағдарламасының Тұрақты өкілі – БҰҰ Тұрақты үйлестірушісі Норимаса Шимамура парламентшілерге құттықтау сөз арнады. Оның айтуынша, Орнықты дамудың ауқымы бойынша бәрі қамтылатын және өршіл мақсаттарына қол жеткізу барлық мүдделі тараптардың тығыз әріптестігі жағдайында ғана қол жеткізуге болады.
Ал Сыртқы істер министрінің орынбасары Ержан Ашықбаев Қазақстанда ОДМ-ны іске асыру барысы туралы сенаторларды хабардар етті.
Таныстырылымға қатысушылар Сенат депутаттары Бірғаным Әйтімова, Ақан Бижанов, Геогрий Ким және Дархан Кәлетаевтың қойған сауалдарына жауап берді.
Шара қорытындысы бойынша сенаторлар Орнықты даму қағидаттарын ілгерілету қажеттігі және Орнықты даму мақсаттарын іске асыруға қолайлы жағдай қалыптастыру үшін қолданыстағы заңнамаға ОДМ-ны кіріктіруге жәрдемдесу атап өтілген мәлімдеме қабылдады. Мәлімдемеде ОДМ-ға қол жеткізу Қазақстанның халықтың әл-ауқатын жақсартуға және әлемдегі бәсекеге ең қабілетті 30 елдің қатарына енуіне мүмкіндік беретіні айтылады, деп хабарлады Сенаттың баспасөз қызметі.
2236 рет оқылды_140_110.webp)
