Бүгін Шымкент қаласында өткен «Денсаулық-2017» фестивалі аясында Оңтүстік Қазақстан облысының әкімі Жансейіт Түймебаев Германияның Гамбург қаласында өткен бокстан Әлем чемпионатының алтын жүлдегері Қайрат Ералиев пен қола медаль иегері Жомарт Ержанды жеңістерімен құттықтап, сый-құрмет көрсетті, деп хабарлайды облыстық әкімдіктің баспасөз қызметі.
Неміс жерінде өткен дүбірлі додада еліміздің қоржынына жалғыз алтынды алып беріп, көк туымызды көкке желбіреткен әлем чемпионы Қайрат Ералиевке облыс әкімі 4 миллион теңгенің сертификатын табыс етті. Ал, әлем чемпионатының қола медалін еншілеген Жомарт Ержанға 1 миллион теңгенің сертификатын тапсырды.
Сонымен бірге, облыс әкімі Қайрат Ералиевтің жеке бапкері, бокстан Қазақстан құрамасының бас жаттықтырушысы Мырзағали Айтжановқа 4 миллион теңге, ал үшінші орын иеленген боксшымыздың жеке бапкері Нүркен Андасовқа 1 миллион теңге қаржылай сыйлық табыстады.
Өңір басшысы жеңімпаз спортшыларымыздың әлем чемпионатында көрсеткен ерлігі жастарды отаншылдыққа тәрбиелеп, спортқа деген қызығушылығын арттыруға септігін тигізетінін айтты.
«Сіздер әлемдік додада ел намысын қолдан бермей, биік тұғырдан көріндіңіздер. Алдағы уақытта да осы бағыттарыңнан таймай, биік белестерді бағындыра берулеріңе тілектестік білдіремін», - деді Жансейіт Қансейітұлы.
Қайрат пен Жомарт - білікті басшы Балғабай Елшиев басқаратын облыстық жоғары спорт шеберлігі мектебінің сайыпқырандары. Жігіттердің чемпионатқа дайындалуына облыстық дене шынықтыру және спорт басқармасының басшысы Әлібек Нұртаев та бар жағдайды жасады. ҚР Бокс федерациясының да еңбегі мол. Сенім мен еңбек ақталып, өрендеріміз көк туды биікке өрлетті.
1575 рет оқылды
