Нұр-Сұлтанда бұрынғы әйеліне шабуыл жасаған ер адам іздестіріліп жатыр. Бұл туралы Нұр-Сұлтан қалалық Полиция департаментінің баспасөз қызметі хабарлады, - деп хабарлайды Tengrinews.kz тілшісі.
Бұған дейін әлеуметтік желіде әйелдің соққыға жығылған сәті түсірілген кадрлар тараған болатын. Жазбада "әйелді тоғыз ай бойы артынан қалмаған бұрынғы күйеуі анасының көзінше ұрып-соққаны" жазылған.
Полиция видеоға қатысты пікір білдірді.
"Әлеуметтік желілерде жүргізілген мониторинг кезінде ер адамның әйелді ұрып-соғып жатқаны түсірілген видео анықталды. Полицейлер 13 сәуірде сағат 7.50-де елорданың 25 жастағы тұрғыны Сығанақ көшесінде өзінің бұрынғы әйелін ұрып-соққанын анықтады. Дерек Есіл аудандық полиция бөлімінде тіркелді, ер адамның жүрген жерін анықтау шаралары жүргізіліп жатыр", - делінген хабарламада.
Тәртіп сақшыларының айтуынша, жәбірленуші бұған дейін полицияға екі рет арыз берген.
"Тұрмыстық зорлық-зомбылық профилактикасы туралы" заңның 20-бабына сәйкес кінәліге қатысты қорғау нұсқамалары шығарылды, ол тұрмыстық зорлық-зомбылық жасауға, қудалауға және өзге де тәсілдермен байланысқа түсуге тыйым салуды көздейді. Ер адамға ҚІЖК-нің 461-бабында көзделген "Қорғау тәртібін бұзу" заңы түсіндірілді. Алайда ол қорытынды шығармай, ісін жалғастыра берген", - деді полиция өкілдері.
Полиция департаменті мәліметінше, 2022 жылдың наурызында да ер адам екі рет сот қаулысымен құқықбұзушылық жасағаны үшін кінәлі деп танылған, сот ескерту түріндегі әкімшілік жаза қолданған.
634 рет оқылды
