Елорданың бір субұрқағын күтіп ұстауға жылына 38 млн теңге бөлудің еш қажеті жоқ. Бұл туралы бүгін «Нұр Отан» партиясының Нұр-Сұлтан қалалық филиалы төрағасының орынбасары Владислав Сергеев айтты, деп хабарлайды ҚазАқпарат тілшісі.
«Субұрқақты тұмшалауға және қайта ашуға - 38 млн теңге. Біз өткен жылы әдемі имидждік субұрқаққа өте қомақты қаржы бөлдік. Бірақ, жыл сайын 38 млн теңге бөлетін болсақ, онда мұндай субұрқақтың қажеті қанша?» - деді ол Нұр-Сұлтан қалалық әкімдігі жанындағы қоғамдық кеңес отырысында.
Айта кетерлігі, қоғамдық кеңес отырысында Нұр-Сұлтан қалалық стратегиялық және бюджеттік жоспарлау басқармасы басшысының міндетін атқарушы Айжан Түгелбаева 2019 жылғы қала бюджеті туралы баяндап, бір субұрқақты қыста тұмшалап, жазда қайта ашқанға 38,6 млн теңге ашқа бөлінгенін айтқан еді.
2618 рет оқылды
