ІІМ 30 қыркүйекте Нұр-Сұлтан көпірінде болған жол-көлік оқиғасы бойынша күдікті ұсталғанын растады, - деп хабарлайды "Ұлт ақпарат" Tengrinews.kz агенттігіне сілтеме жасап.
"30 қыркүйекте Нұр-Сұлтан қаласында көпірде болған апат куәгерлерінің айтуынша, апатқа қатысушылар жарыс ұйымдастырған. Бұл - расталған ақпарат емес. "Сергек" бейнебақылау камераларынан видеолар қашан жарияланады? Түнгі жарысқа қандай автокөліктер қатысты және машиналар кімге тиесілі", - деп сұрады журналист ОКҚ брифингінде.
"Иә, аталған жол-көлік оқиғасы қоғамды бейжай қалдырмады. Қазіргі таңда елорданың полиция департаменті қылмыстық іс қозғады. Нақты айтқанда, Қылмыстық кодекстің 345-бабының 4-тармағына сәйкес жол ережесін бұза отырып, "2 немесе одан да көп адамның өліміне себеп болу" және 347-баптың 1-тармағына сәйкес "оқиға орнынан кетіп қалуға" қатысты тергеу жүріп жатыр. Апат орнынан қашып кеткен күдікті ұсталды. Күдікті деп танылған 19 жастағы елорда тұрғыны бүгінде 2 айға уақытша қамауға алынды. Жол апатының уақытына келсек, ол бізде нақты тіркелген. Түнгі сағат 00:18-де болған. Бұл - біздегі ресми дерек", - деп жауап берді ІІМ Тергеу департаментінің бастығы Санжар Әділов.
Тілшілердің көше камераларынан видеоны жариялау туралы өтінішіне жауап ретінде видеолар іс материалдарына заттай дәлел ретінде тіркелгенін және жариялауға болмайтынын түсіндірді.
976 рет оқылды
