Елорданың медициналық оқу орындарының 360-тан астам студенті COVID-19 науқастарын емдейтін емханаларда жұмыс істей бастайды, - деп хабарланды қала әкімдігінің ресми сайтында.
Оларға елордалық дәрігерлермен бірдей еңбек және демалыс жағдайы қарастырылған.
Елорданың медициналық мекемелеріне 363 жас маман, оның ішінде 226 интерн, 113 резидент, 18 бакалавр, 5 магистрант және бір докторантура түлегі жұмысқа орналастырылды. Жас мамандар қалалық ауруханалар, емханалар, диспансерлер мен қалалық жедел жәрдем станциясына жұмысқа орналасады.
Қазіргі уақытта жас мамандардың 43-і қалалық жұқпалы аурулар орталығы мен «Рамада Плазадағы» провизорлық стационарда орта және кіші медицина қызметкері (маман сертификаты жоқ) ретінде жұмыс істеп жатыр.
«Мен елордалық жаңа жұқпалы аурулар ауруханасында мейірбике болып істеймін. Біздің дәрігерлердің қатты күйзелгенін көріп отырмыз. Сондықтан, осы қиын күндерде біз жұмысқа шығып, коронавирус инфекциясымен ауыратын науқастарға көмектесудеміз. Біз дәрігерлердің басшылығымен әртүрлі процедуралық тапсырмаларды орындаймыз. Біз дәрі тамызғыш қойып, екпе жасап, науқастардың жағдайын қадағалаймыз», – дейді жас маман Жандос Насыбаев.
Сонымен қатар Нұр-Сұлтанда медицина университеті мен колледжінің 200-ден астам түлегі пандемия жағдайында жұмыс істеуге оқытылды. Дәрігерлер жас әріптестерімен тәжірибе бөлісті. Қазіргі уақытта олардың барлығы жұмысқа алынған және COVID-19-бен күресуге атсалысып жүр.
«Бүгінде барлық медицина қызметкерлері коронавирус инфекциясымен күресте алдыңғы қатарда. Жас мамандар, студенттер де шет қалмай, біздің дәрігерлерге белсенді көмектесуде. Тәжірибелік сабақтың аясында олар коронавирус инфекциясымен ауыратын науқастарға көмек көрсету үшін қаланың медициналық мекемелеріне барады. Жалпы, медицина университеті мен колледжінің 500-ден астам түлегі COVID-19-бен күресуге атсалысады», – деді Нұр-Сұлтан қалалық денсаулық сақтау басқармасы басшысының міндетін атқарушы Әлия Рүстемова.
Әр медицина ұйымында жас мамандарға кеңес беретін аға маман бар. Барлық мамандар қажетті жеке қорғаныс құралдарымен қамтамасыз етіледі.
1022 рет оқылды
