_48_48.webp)
Мүмкіндігі шектеулі азаматтарға берілетін арнаулы жәрдемақы ең төменгі күнкөріс деңгейінің 1,4 есе көбейтілген мөлшеріне дейін болады. Бұл туралы Nur Otan партиясының кезектен тыс XX Съезінде ҚР Президенті Қасым-Жомарт Тоқаев айтты, деп хабарлайды "Ұлт ақпарат".
«Тұрақты күтімге мұқтаж және жеке көмекші қызметін пайдаланбайтын 1-топтағы мүмкіндігі шектеулі азаматтардың барлығына қосымша әлеуметтік қолдау көрсетіледі. Осыған орай берілетін арнаулы жәрдемақы ең төменгі күнкөріс деңгейінің 1,4 есе көбейтілген мөлшеріне дейін болады. Алдағы 5 жыл ішінде біз ерекше күтімді қажет ететін адамдарды арнаулы техникалық құралдармен қамтамасыз етеміз. Сондай-ақ оларға толықтай оңалту-сауықтыру қызметі ұсынылады. Бірақ, ең бастысы әр адамға табыс табу мүмкіндігін беру керек. Бұл ретте біз нақты шаралар қабылдаймыз», - деді ҚР Президенті.
Мемлекет басшысының айтуынша, соның нәтижесінде 2025 жылға қарай мүмкіндігі шектеулі азаматтарды жұмыспен қамту көрсеткіші 30 пайызға жетеді.
«Осындай жандардың кәсіби қызметпен айналысумен бірге білім алуына да жағдай жасау маңызды. 5 жыл ішінде колледждер мен жоғары оқу орындары инклюзивті білім беру үдерісімен толық қамтылады. Сонымен қатар мектепке дейінгі барлық мекемелер мен мектептерде бұл көрсеткішті кезең-кезеңмен 70 пайызға дейін жеткіземіз», - деді Қасым-Жомарт Тоқаев.
974 рет оқылды_140_110.webp)
