27 ақп, 2025 сағат 11:13

"Мен енді Украинаға ақша жұмсағым келмейді" — Дональд Трамп

Фото: Brandon Bell / Getty Images

Кеше кешке Ақ үй басшысы министрлер кабинетінің басын қосып, біраз маңызды мәлімдеме жасады. Дональд Трамп Украинаның НАТО-ға қосылуы екіталай екенін айтты, деп хабарлайды Ult.kz.

"НАТО-ны ұмытқаны жөн шығар. Менің ойымша, бұл бәрінің басталуына себеп болған", — деп жауап берді АҚШ президенті Киевке болашақта қандай жеңілдіктерге бару керек деген сұраққа.

Трамптың журналистерге жасаған басқа мәлімдемелері:

- АҚШ Франция мен Ұлыбританияның Украинада бітімгершілік күштерін орналастыру туралы ұсыныстарын қолдайды;
- Киевтің қауіпсіздік кепілдіктерін қамтамасыз ету Еуропаның міндеті болады, АҚШ-тың емес;
- АҚШ Украинаға қолдау көрсету үшін 350 миллиард доллар бөлді, және Зеленский жұма күнгі сапары кезінде сирек кездесетін жер металдары туралы келісімге қол қояды. "Мен енді Украинаға ақша жұмсағым келмейді", — деп қосты Трамп;
- "ЕО АҚШ-ты алдау үшін құрылған. Олар мұны істеп үлгерді, бірақ енді билік менде";
- "Әділетсіз шектеулерге" жауап ретінде АҚШ ЕО-дан келетін тауарларға, соның ішінде автомобильдер мен басқа да өнім санаттарына 25% кедендік баж салады;
- Владимир Путин — өте ақылды саясаткер, бірақ Ресейге қақтығысты реттеу үшін ымыраға келуге тура келеді;
- Қазіргі уақытта Ресейге қарсы санкцияларды алып тастау мәселесі қарастырылмайды, өйткені алдымен әскери әрекеттерді аяқтау қажет.