10 сәу, 2020 сағат 08:40

Маңғыстауда екі әйел Жаңаөзендегі науқастан коронавирус жұқтырған

Маңғыстау облысында тағы екі адам коронавирус инфекциясын жұқтырған, - деп хабарлайды облыстық қоғамдық коммуникация орталығы.

Маңғыстау ауданы Шетпе ауылындағы аудандық ауруханада коронавирус инфекциясын жұқтырған тағы екі адам тіркелді. Екі науқас та - 40 жастағы әйел.

Олар Жаңаөзен қаласында 8 сәуір күні вирус анықталған 1974 жылғы әйелмен байланыста болған. Осыған орай карантинге алынып, қаны мен ауыз қуысынан алынған сынамаға зертханалық сараптама жасалынған болатын.

Диагностикалық зерделеу нәтижесінде екеуінен де COVID-19 анықталды. Бекітілген протокол бойынша ем шаралары жасалып жатыр.

Науқастармен байланыста болған азаматтар анықталып, дәрігерлердің бақылауына алынды. Індет аумағы залалсыздандырылып жатыр.

Айта кетейік, бүгінгі ақпарат бойынша Қазақстанда 802 адам коронавирус жұқтырған. Оның ішінде Маңғыстауда 9 науқас бар.