Қызылорда облысында алдағы аптада аптап ыстық болады деген болжам бар. Кей жерлерде 45-46 градусқа дейін көтеріледі.
Бұл жөнінде «Қазгидромет» мекемесінің мамандары мәлім етті.
Олардың айтуынша, өңірде аптап ыстық 27 маусымнан бері байқалып отыр.
Күндізгі температура 39-44 градусты көрсетсе, ол түнге қарай 25-30 градус щамасында.
«Ол оңтүстіктен келген жылы ауа массасының әсерінен болып отыр. Ауа райының мұндай құбылысы алдағы бір апта көлемінде сақталады деп күтілуде. Ол кей жерлерде 45-46 градусқа дейін жетеді деп күтілуде. Өте жоғары өрт қаупі бар», - деqді «Қазгидромет» РМК Қызылорда облысы бойынша филиалының бөлім басшысы Әйгерім Жүкелева.
Осы орайда дәрігерлер азаматтардан барлық сақтық шараларына назар аударуды сұрайды.
«Аптап ыстықта адамдарда бас айналу, әлсіздік, енжарлық байқалады. Кей жағдайда мұрыннан қан кету жағдайы көрініс береді. Қан қысымы көтеріліп кетуі мүмкін. Осындай сәттерде өздерін жайсыз сезінген, жүрек-қан тамыры ауруымен сырқаттанатын адамдап далаға шықпағаны дұрыс», - деді облыстық салауатты өмір салтын қалыптастыру орталығының дәрігері Толқын Мұхамбет.
