26 қар, 2020 сағат 14:45

Коронавируспен күрес: Қызылордада медицина қызметкерінің резерві құрылды

Қызылорда облысында коронавирус инфекциясының болжамды екінші толқынына дайындық жұмыстары күшейтілді, деп хабарлайды "Ұлт ақпарат".

Қазір облыста коронавирус инфекциясына байланысты жағдай тұрақты. Медициналық ұйымдар штаттық режимде жұмыс істеуде. Аймақта 3500 медицина қызметкерінің резерві құрылған.

Қызылорда қаласында 200 адамға арналған модульдік жұқпалы аурулар ауруханасының құрылысы жүргізілуде. Көпбейінді облыстық ауруханада және Қазалы ауданаралық ауруханасында демеушілер есебінен оттегі станциясы салынуда.

«Тез соғылатын модульді инфекциялық аурухананың құрылысы желтоқсан айының бірінші онкүндігінде аяқталады. Онда науқастардың ем алуына толық жағдай жасалады. Емдеу орнында жергілікті дәрігерлер қызмет атқарады», - деді облыстық денсаулық сақтау басқармасының басшысы Сәбит Пазылов.

Жыл басында облыста өкпені жасанды желдету (ИВЛ) аппаратының саны 76 болған еді. Қазіргі таңда олардың саны 244 данаға жетті.