Фото: gemotest.ru
Алматыда көкжөтел жұқтырғандар көбейді, деп хабарлайды "Ұлт Ақпарат" Қазақстан Ұлттық арнасына сілтеме жасап.
Былтыр 5 жағдай тіркелсе, биыл бес айдың өзінде 62 балаға көкжөтел тиген. Олардың басым бөлігі – 14 жасқа толмағандар. Бүлдіршіндердің 90 пайызы – ауруға қарсы екпе алмаған. 16 пайызға жуығы – екпе жасына жетпеген бала.
Жалпы нәрестеге 2, 3, 4, 18 ай болғанда вакцина салдыруға болады. Мамандардың айтуынша, алғашында науқаста қарапайым суық тиюдің белгілері болады. Кейін жөтел дендеп, баланың дене қызуы көтеріледі. Оның алдын алу жолы – уақытында екпе егу, - дейді дәрігерлер.
Алмаш Ахметова, қалалық санитариялық-эпидемиологиялық бақылау департаментінің бөлім басшысы:
Көкжөтел жұқпалы болып табылады. Науқас жөтелгенде, сөйлегенде, түшкіргенде қасындағы адамдарға жұғады. Қандай да бір белгілері болса өзін өзі емдеумен айналыспай, дер кезінде тұрғылықты жердегі емханаларда медициналық қызметкерлерге қаралып, олардың ұсынған емін қабылдау қажет, сонымен қатар, ауырған балалар болса көпшілік баратын орындауға апармауын сұраймыз.
Солтүстік Қазақстан облысында да 46 адамның көкжөтел жұқтырғаны анықталды. Дені бала. Мамандардың айтуынша, олардың 95 пайызы жұқпалы дертке қарсы екпе салдырмаған. Бұл дерт әсіресе, жаңа туған нәрестелер үшін өте қауіпті деп отыр. Өңірде былтыр көкжөтелмен ауырған адам тіркелмеген.
71114 рет оқылды
