18 қар, 2016 сағат 13:58

Қоғамдағы келісімге арналған семинар

Ақтау қаласында Қазақстан Республикасы Президенті жа­нындағы «Қоғамдық келісім» республикалық мемлекеттік мекемесі мен Маңғыстау облысының Қазақстан халқы Ассам­блеясының ұйымдастыруымен қазақстандық татулық пен келісім үлгісін ілгерілету бойынша өңірлік семинар өтті.

Оның көздеген мақсаты – «100 нақты қадам» Ұлт жоспарын және Ассамблеяның «Үлкен ел – үлкен отбасы» жобасын жүзе­ге асыру аясында қоғамдық келі­сім мен тұрақтылықты қамта­масыз ету мәселелері бойынша тыңдаушылардың кәсіби білімі мен біліктілік деңгейін арттыру. Бұған дейін Ақтөбе, Оңтүстік Қазақстан, Алматы, Жамбыл, Шы­ғыс Қазақстан облыстарында өтіп, Маңғыстау өңірінде жалғасын тапқан семинарға мемлекеттік қызметкерлермен бірге, БАҚ өкілдері, этно-мәдени және діни бірлестіктердің, түрлі қоғамдық ұйымдардың, Ассамблея жанынан құрылған «Қоғамдық келісім» кеңестері мен Аналар кеңестерінің өкілдері қатысты.

– Семинар аясында әрбір өңір­дің этнодемографиялық, мә­де­ни, менталитеттік, шаруашылық-экономикалық, әлеу­меттік дамуындағы ерекшеліктерді ескере отырып, тақырыптарды өңірдегі өзекті деген мәселелерге бағыттап қоямыз. Жалпы, семинарда қоғамдық келісімді қамтамасыз ету тетіктері, мемлекеттік саясатты жүзеге асыру, этносаралық және конфессияаралық қатынастарды, көші-қон үдерістерін реттеу мә­селелері, сондай-ақ діни экстремизммен, терроризммен күрес, олардың алдын алу тақырыптары, халықтың әлеуметтік мәселелерін шешу, ауылдық елді мекендерді дамыту мәселелері және «Мәң­гілік Ел» идеясын ұғындыру та­қырыптары қамтылуда, дейді Қазақстан Президенті жанындағы «Қоғамдық келісім» РММ дирек­торының орынбасары Т.Жақиянов.

Қазақстан халқы Ассамблеясы Хатшылығының, Денсаулық сақ­тау және әлеуметтік даму ми­нистрлігінің, Қазақ­стан мұ­сыл­мандары Діни басқар­ма­сының өкілдері мен ғалымдар дәріс бе­­ретін семинарда өңірлердің ерекшеліктерімен бірге проблемалары да талданып, оларды шешу жолдары қарастырылды. Инвестициялық тартымдылығы жоғары, отандық және шетелдік компаниялар көптеп қызмет ететін Маңғыстау өңірінде сұранысқа ие еңбек қатынастарын реттеуге қатысты дәрістерді Ассамблея жанынан құрылған медиация институты медиаторлары оқып, медиативтік технологияның әдіс-тәсілдерін, қағидаларын үйретті. Семинар қорытындысында өңірдің мәселелері пен проблемалары анық­талып, оларды шешу жолдары іздестіріліп, Президент Әкім­шілігіне хат жолданды. Осылайша, семинар нәтижесінде анықталған істі жоғары деңгейде шешу мүм­кіндігі бар.

Лекторлар мазмұнды да қы­зықты дәрістерін жастар саясаты орталығында, оқу орындарында оқып, Жаңаөзен қаласы активімен кездесу өткізді. Бір апта бойы Маңғыстау өңірінде болған олар сарапшылар мен жастар тарапынан қойылған түрлі сауалдарға жауап беріп, өңірдің әлеуметтік-экономикалық ахуалы мен жалпы қоғамдық жағдайын зерделей түсті.

Гүлайым ШЫНТЕМІРҚЫЗЫ,

«Егемен Қазақстан»

Маңғыстау облысы