22 қар, 2021 сағат 10:54

Книжевский қоймасындағы ақау: Аққан су деңгейі төмендеді

Алматы облысындағы Книжевский қоймасынан аққан су деңгейі төмендеді. Бұл жайында Жамбыл аудандық төтенше жағдайлар бөлімінің бастығы, азаматтық қорғаныс подполковнигі Айбек Жанаев мәлім етті, деп хабарлайды ҚазАқпарат.

«22 қараша күні сағат 7:30-да Жамбыл ауданында, Мыңбаев ауданына тақау маңдағы Книжевский су қоймасынан аққан судың деңгейі төмендеді. Су ені 4 метр болатын жырық арқылы ағып жатыр. Ағып жатқан судың көлемі 5-6 текше метрді құрайды. Сонымен қатар облыстық жолдан тереңдігі 5 сантиметр , ал енді 30 метр көлемінде асып төгілуде. Зардап шеккендер мен қаза тапқандар жоқ. Құрылыс нысандарына да ешқандай қатер байқалмайды. Ахуал тұрақты, су төмендеп, баяу ағып жатыр», - деді Айбек Жанаев.

Еске салсақ, бұған дейін Алматы облысы Жамбыл ауданы Мыңбаев ауылының маңында Книжевского су қоймасы бөгетінде жарық пайда болғаны туралы хабарлаған болатынбыз.