18 нау, 2025 сағат 15:25

Алматыда «КиноКөрісу» марапаттау кеші өтті

Фото: ұйымдастырушылардан

2025 жылы 14 наурызда Алматы қаласында Salem Entertainment ұйымдастырған «КиноКөрісу» марапаттау кеші өтті. Шара өткен жылдың қорытындысын шығарды, деп хабарлайды Ult.kz.

«Біз әріптестеріміздің жетістіктерін құрметтейміз және қазақстандық киноның дамуы үшін ашық әрі ынтымақтастыққа негізделген орта қажет деп санаймыз», — деп атап өтті Salem Entertainment бас продюсері Қуат Садықов.

Үздіктерді тану және марапаттау

Марапаттау кешінде киноиндустрияға айтарлықтай үлес қосқан мамандар мен компаниялар атап өтілді:

Tiger Films — экшн жанрын дамытуға қосқан үлесі үшін;
Ақан Сатаев және Саят Исембаев — қылмыстық драманы жаңа деңгейге шығарғаны үшін;
Қазақфильм — ұлттық киноға 90 жыл қызмет еткені үшін;
Bas Production — «Патруль» сериалының көпжылдық табысы үшін;
Нұрлан Қоянбаев — қазақстандық кинонарықтағы коммерциялық серпілісі үшін.

Сонымен қатар, Filmmakers, Corich Group, Art Dealers, Freedom Media, Unico Play секілді киноөндіріс саласындағы басқа да компаниялар марапатталды.

Фото: ұйымдастырушылардан

Қазақфильм студиясы қазақ киносының алтын қорындағы культтік фильмдерді қалпына келтіру, студияларды жаңғырту және техникалық жабдықтарды жаңарту туралы жоспарларымен бөлісті. Бұл бастамалар ұлттық мұраны сақтау және жаңа буын кинематографистерді дамытуға бағытталған маңызды қадам деп отыр ұйымдастырушылар.

Кештің ең басты жаңалықтарының бірі — 5,5 миллиард теңге көлеміндегі Tolqyn Film Fund қорының іске қосылуы. Ұйымдастырушылардың сөзінше бұл қор қазақстандық киноөндірісті, соның ішінде жанрлық фильмдерді қолдауға жаңа мүмкіндіктер ашады. Жас және тәжірибелі режиссерлер мен сценаристер өз идеяларын жүзеге асыру үшін осы қордың көмегіне жүгіне алады.

«Күшті нарық жабық есіктердің артында емес, ашық диалог пен ортақ жұмыс арқылы қалыптасады», — деп түйіндеді Salem Entertainment бас директоры Игорь Цай.