Фото: adyrna.kz
ҚР Парламенті Мәжіліс депутаты, «Ақ жол» фракциясы мүшесі Қазыбек Иса елімізді түбегейлі жаңғырту үшін ауқымды реформа бастаған Президент Қ.Тоқаевтың Жолдауынан бері үш жылдың ішінде іргелі өзгерістер жасалды деп есептейді. Бұл туралы Ult.kz хабарлайды.
"Жалпыхалықтық референдум арқылы Ата заңға түзетулер енгізілді. Парламенттің ықпалы артып, есеп беретін Үкіметке жауапкершілік жүктелді. Конституциялық сот құрылды. Жаңарған ауыл әкімдерінің 72 пайызының үштен бірі – бұрын мемлекеттік қызметте болмаған жаңа адамдар болғандықтан, жаңа леп келді. Аудандар мен облыстық маңызды қалалардың 45 әкімі сайланды. Ал биылдан бастап барлық аудан әкімдерін халық тікелей сайлайды. Халық сайлаған әкім халық алдында есеп береді, яғни қарқынды қайрат көрсетуге ұмтылады", -дейді депутат.
Қазыбек Исаның айтуынша өткен отыз жылдық биліктің орасан зор зардабы өтіп кеткен ел түбегейлі өзгерістердің тез және қарқынды да, ауқымды жүргенін қалайды. Бірақ өмірдегі өзгерістерді бір нүктені басып қалсаң, бәрі бірден өзгеріп кететін ертегідегі ғажайыппен шатастырмау керек.
"Батпандап кірген ауру мысқалдап шығады" дейді атам қазақ. Дегенмен, отыз жыл сірескен сеңді үш жылда қозғап жіберген нақты өзгерістер көз алдымызда өтуде. Мемлекетке қайтарылған заңсыз активтер құны екі триллион теңгеден асады. "Әділетті Қазақстанның" бәріне бірдей "Заң мен тәртіп" қағидаты болмаса, бұлардың бірі де болмас еді. Дәл осы қағидат Президенттің басты жеңісі деп білемін. Ұлттық қордан балалар болашағы үшін қаржы салуды алдымен өздерінің жеке байлықтарын көбейтуді ойлаған бұрынғы билік ешқашан болуы мүмкін еместей көрсететін. Ал қазір бәрі де мүмкін болып, әр баланың есепшотына алғашқы салымдар түсіп жатыр", -дейді депутат.
Қ. Исаның сөзінше Алтын Орда түгілі Алаштың атын айтқызбаған кешегі отыз жыл артта қалып, Жошы ханға Ұлытауда, Алаш көсемдеріне астанадан бастап, көптеген қалаларда асқақтаған ескерткіштері орнауда. Оның пікірінше бұл істердің барлығы тікелей Мемлекет басшысы – Қасым-Жомарт Кемелұлының тікелей пәрменімен іске асырылып келеді.
Сонымен қатар мәжілісмен ұлттық идеологияға да тоқталып өтті.
"Тарихтан белгілі, қандай ел болса да, Ұлттық идея болмаса, дамуы қарқынды болмайды! Кеше өткен Ұлттық Құрылтайда мемлекет басшысы тапсырған мемлекеттің ішкі саясат тұжырымдасын жасауды тапсыруы – Ұлттық идеологияның бастамасы екені анық. Қазақстанның Ұлттық идеологиялық концепциясын жасаған партия ретінде «Ақ жол» ішкі саясат тұжырымдамасын жасауға өз үлесін қоса алады. Ал Ұлттық бірегейлікке бастайтын Ұлттық идеологияның негізі - мемлекеттік тіл! Әлемдік тәжірибеден әйгілі жайт - кез келген мемлекеттің азаматтарын біріктіретін басты құрал - мемлекеттік тілі. Ғылымның, жаһанды жаулап келе жатқан жасанды интеллектінің негізі мемлекеттік тіл болуына баса назар аударған мемлекет басшысы Қ.Тоқаев: «Қазақ тілі – ұлттық бірегейлігіміздің нышаны. Ел бірлігін нығайта түсетін басты құндылығымыз!»-деп, атап көрсеткендей, бірегей ұлтқа айналуда мемлекеттік тілдің мерейі артуын іске асыруға бәріміз өз үлесімізді қосуға тиіспіз", -дейді ол.
Конституцияның жаңа редакциясының 6-бабына сәйкес «Жер мен жер қойнауы халыққа тиесілі».
Қазақстанда Әлемдік Банк зерттеуінше, сирек асыл қазыналар жатқан 5 мың кеніштің құны 46 триллион доллардан асады.
2022 жылы мемлекет басшысы бұрынғы өнімді бөлу туралы келісімшарттар 30 жыл бұрын басқа жағдайда жасалғанын, енді оларға түзету енгізу керектігін айтты.
«Ақ жол» партиясы да Өнімді бөлу туралы келісімшарттарды ашық жариялап, қайта жасау туралы бірнеше рет депутаттық сауал жасады деп айтқан Қазыбек Иса: "Құдай берген бүкіл елдің байлығын жеке дара иеленетіндей ол ешкімнің ата-бабасынан қалған мұра емес!" деді.
Ұлттық құрылтайға да тоқталып өткен депутат Мемлекет басшысының бастамасымен құрылған, биыл төртінші рет өтіп, төрт құбыламызды түгендеп жатқан Ұлттық құрылтай жалпыұлттық диалог алаңына айналды дейді.
"Ұлттық Құрылтай - Қазақ тарихындағы елдің ең маңызды мәселелері шешілетін ұлы жиын - Құрылтайдың бүгінгі жаңа заманға сай жаңғырған үлгісі", -деді.
2022 жылы жаңадан Абай, Ұлытау және Жетісу облыстары ашылды. Бұл үш облыстың ашылуы осы аймақтардың дамуына күшті серпін берді деп есептейтін депутат: "Өңірлерге жанданған өмір келді. Әлеуметтік-экономикалық көрсеткіштер едәуір артты, инвестиция келе бастады" деп отыр.
"Енді мемлекет басшысы кеше Құрылтайда Алаш көсемдері Ахмет Байтұрсынұлы мен Міржақып Дулатұлының өмірге келген тарихи өлкеге баса назар аударып, тұтас Торғай өңірінің дамуына тың серпін беретін ауқымды жобаны жариялады. Астанадан Арқалық, Торғай және Ырғыз арқылы Транскаспий халықаралық көлік дәлізіне тура шығатын автокөлік жолының құрылысы басталады. «Бір тау бір топ киікті асырайды» дегендей, бұл күшті күре жол бір қауым елге жұмыс тауып беретін экономикалық серпін болатыны анық.
«Түркістан қаласының ерекше мәртебесі туралы» заң қабылданды. Түркістанға ерекше мәртебе беру мәдени бірегейлікті нығайтып, қаланы Түркі әлемінің рухани астанасына айналдырады.
Елімізді Жаңа дәуірге бастаған іргелі өзгерістер, салиқалы саяси реформа мемлекеттің іргесін бекемдеп, қарқынды дамуы үшін ең алдымен бірегей ұлтқа бастайтын бірлік, ырысқа жеткізетін ынтымақ керек. Тәуелсіздіктің Көк туы көкте мәңгі желбірей беруі үшін бәріміз де өз үлесімізді қосуға тиіспіз.
Ол үшін ел Президенті Қасым-Жомарт Тоқаевтың жанына антына адал, сертіне берік, ісіне мығым адал азаматтардың топтасуы керек!" -деді ол.
747 рет оқылды
