Атырау облысындағы біріктірілген газ-химия кешенінің полипропилен өнімдерінің 90% экспортқа шығарылатын болады. Бұл туралы журналистерге берген сұхбатында «Самұрық-Қазына» АҚ басқарма төрағасы Өмірзақ Шөкеев мәлімдеді.
«Қазіргі кезде іске асырудың белсенді сатысында – полипропилен өндіру жобасы. Зауытты іске қосу 2020 жылдың соңына жоспарланып отыр. Шығарылған өімдердің 90% экспортқа жөнелтілетін болады, 10% ішкі өндірісті дамыту үшін Қазақстанда қалады», - деп қор басшысы химия өнеркәсібін дамыту туралы әңгімесінде айтып өтті.
Зауыт мұнай-химия өнеркәсібін дамытудың үкіметтік бағдарламасы аясында әзірленген «Атырау облысындағы интеграцияланған газ-химия кешенінің құрылысы» жобасының бір бөлігі болып табылады.
Атырау мұнай-химия кластері базалық өнімдері: полипропилен, полиэтилен шығарумен қатар, көмірсутекті шикізаттарды терең өңдеуді көздейді. Жобалардың жалпы құны 10 млрд долларға дейін бағаланады.
«Осы түпкі өнімдер - полипропилен, полиэтилен төңірегінде одан әрі өңделетін полимер өнімдерінің 50-ден астам түрін шығару жоспарланып отырған, шағын және орта бизнес кәсіпорындарын құруға болады», - деп есептейді Ө. Шөкеев.
Жобаны Қазақстанда химия өнеркәсібін жаңғырту және осы саладағы инновациялық жобаларды іске асыру үшін арнайы құрылған «Самұрық-Қазына» қорының еншілес компаниясы «Біріккен химиялық компания» ЖШС жүзеге асыруда.
2573 рет оқылды_140_110.webp)
