Фото: ҚФФ ресми сайты
Футболдан 19 жасқа дейінгі 2026-2027 жылғы Еуропа чемпионатын Алматы мен Шымкентте өткізуге өтінім берілді. Бұл туралы Қазақстан футбол федерациясының басшысы Әділет Барменқұлов мәлімдеді, деп хабарлайды Sputnik Қазақстан.
"Қазақстан футбол федерациясы мен ФИФА, УЕФА арасындағы ынтымақтастықтың келешегі зор. 2022 жылы УЕФА 19 жасқа дейінгі қыздар арасындағы 2022-2023 жылғы Еуропа чемпионатының іріктеу турнирінің матчтарын Алматыда өткізуді Қазақстанға сеніп тапсырды. Бұл біздің халықаралық іс-шараларды сапалы ұйымдастыруға қабілетті екенімізді дәлелдейді", - деді Барменқұлов.
Ол сондай-ақ алдағы уақытта футболдан Еуропа чемпионаты Қазақстанда өтуі мүмкін екенін айтты.
"Біз әлемдік футбол аренасында өз позициямызды нығайтуға белсенді түрде ұмтылып жатырмыз. Футболдан 19 жасқа дейінгі 2026-2027 жылғы Еуропа чемпионатын Алматы мен Шымкентте өткізуге өтінім берілді. Бұл сұрақтың жауабы осы жылдың қыркүйек айында белгілі болады деп күтіліп отыр", - деді федерация басшысы.
1516 рет оқылды
