Алматыда қауіп тобындағы барлық пациент дәрі-дәрмекпен толық қамтамасыз етіледі. Бұл туралы өңірлік коммуникациялар қызметі алаңындағы онлайн-сұхбат барысында №4 қалалық емхананың клиникалық фармакологы Әйгерім Тоқтыбаева айтты, деп хабарлайды "Ұлт ақпарат".
Оның айтуынша, бүгінгі күні № 4 қалалық емханада 85 437 адам тіркелген. Оның ішінде диспансерлік есепте 17 060 пациент 45 нозология бойынша тұр.
«Пандемия кезінде біздің емхана 338 273 364 теңгеге 68 нозология бойынша 10 140 пациентті дәрілік заттармен қамтамасыз етті. Бұл топқа 0-ден 96 жасқа дейінгі науқастар кіреді. Белгілі бір аурулары бар диспансерлік есепте тұрған пациенттер, тегін медициналық көмектің кепілдік берілген көлемі мен міндетті әлеуметтік медициналық сақтандыру жүйесі шеңберінде, ҚР Денсаулық сақтау министрлігінің бұйрығымен бекітілген дәрілік заттар мен медициналық бұйымдардың тізбесіне сәйкес, тегін дәрілік заттармен және медициналық бұйымдармен қамтамасыз етіледі», — деп атап өтті Ә. Тоқтыбаева.
Белгілі бір аурулары бар азаматтардың жекелеген санаттары амбулаториялық деңгейде тегін және жеңілдіктегі дәрілік заттармен және медициналық бұйымдармен қамтамасыз етіледі.
Сонымен қатар, коронавирус инфекциясына байланысты амбулаториялық деңгейде тегін берілетін бес атау бойынша препараттардың тізімі анықталды.
«Олардың ішінде үш антикоагулянттық препарат-апиксабан, ривароксабан, дабигатран және антипиретиктер – парацетамол, ибупрофен бар. Бұл препараттардың барлық атаулары коронавирус инфекциясы бар адамдарға тегін беріледі», – деп түсіндірді Ә.Тоқтыбаева.
828 рет оқылды
