Фото: elordainfo.kz
Ұлттық құрылтай мүшесі, Ұлттық ғылым академиясының толық мүшесі, филология ғылымдарының докторы, профессор Кәрімбек Құрманәлиев білім саласының маманы болғандықтан Ұлттық құрылтайдың «Білім және ғылым» секциясының жұмысына қатысады. Ол онда осы салаға қатысты мәселелерді көтеріп келеді. "Кейбір енгізген ұсыныстарым қолдау тауып та жатыр" деген Кәрімбек Құрманәлиев пікірін білдірді. Бұл туралы Ult.kz хабарлайды.
"Құрылтайдың Бурабайда өткен төртінші отырыстың білім саласына қатысты секциясында да жоғары оқу орындарының мәселесін көтердім. Әсіресе оқулықтар туралы пайымды пікір білдірдім. Бүгінде Қазақстанда 630 мың студент бар болса, солардың 75%-ы қазақ бөлімінде оқиды екен. Ал олардың қазақ тіліндегі оқулықпен қамтылу деңгейі бар болғаны 39% ғана. Бұл әрине елдік мәселе. Осыған орай мен орта білім беру оқулықтары сияқты студенттерге арналған оқулық шығаруға да мемлекеттік деңгейде қолдау танытып, бұл іске республикалық бюджет есебінен қаржы бөлуді ұсындым. Әрине мұндай көп қаржыны талап ететін бастама Қаржы министрлігіне ұнамайтыны анық. Сондықтан мен неғұрлым аз ақша шығын болатын жолды, яғни оқулықты электрондық нұсқада дайындауды айттым. Бұл бір жағынан қаржыны аз талап етеді, екінші жағынан оқулықтарды тарату ісінде еш шектеу болмайды. Тиісті министрлік бұл ұсынысқа келіскендей болды.
Тағы бір өзекті мәселе ретінде докторлық диссертация қорғайтын ізденушілердің халықаралық ғылыми журналдарға мақала шығарудағы түйткілді жайтты қозғадым. Яғни бүгінде берген мақалаңның шығуын бір, кейде екі жылдай күтуіңе тура келіді. Кандидат диссертациясын жазып болып, қорғауға дайын отырғанымен халықаралық ғылыми журналға мақаласы шықпай, әуре-сарсаңға салынып, сарыла күтіп жүреді", -дейді ол.
Сондай-ақ Ұлттық құрылтай мүшесінің айтуынша қазіргі таңда біздің елде 300-ге жуық ғылыми журнал шығады екен.
"Жоғарыда айтқан проблеманы шешу жолы ретінде біз еліміздегі ЖОО және ғылыми институттардан басылып шығатын журналдардың бас редакторларының басын қосатын қауымдастық құруды ұсынып отырмыз. Ол қауымдастық журналдардың ішінен конкурс арқылы Scopus базасына өтетін, халықаралық талапқа сай ғылыми журналдарды іріктеп алады. Ғылым және жоғары білім министрі бүгін Президент жанындағы Ұлттық ғылым академиясы қасынан аталған қауымдастықтың құрылатынын айтып қуантты. Демек, енді мақала шығаруға төлейтін ақшаны айдалаға шашпай, өзіміздің ғылыми басылымға төлейтін мүмкіндік туып отыр. Осының арқасында кандидат диссертацияны қорғауға кететін уақытын үнемдесе, екіншіден басылымдардың да сапасы артып, олардың ғылыми тұрғыдан күшейе түсуіне көп көмек болмақ", -дейді Кәрімбек Құрманәлиев.
979 рет оқылды
