Қаңтар оқиғасы кезінде екі полиция департаментінен 800 атыс қаруы ұрланған. ҚР Бас прокуроры Берік Асылов Мәжілісті жалпы отырсында осындай мәлімет берді, деп хабарлайды ҚазАқпарат.
«Қылмыскерлер тек Алматы және Жамбыл облыстарының екі полиция департаментінен 800-ге жуық атыс қаруын, оның ішінде 262 автомат, 501 тапанша, 12 гранатомет, пулемет және 60 мыңнан астам оқ-дәрі ұрлады.
Аңшылық дүкендерінен және құқық қорғау және арнайы органдардың қару-жарақ арсеналынан шамамен 3 мың қару ұрланған Оның тек үштен бірі немесе 771 данасы табылды.
2 мыңнан астам қару-жарақ, соның ішінде автоматтар, мылтықтар, тапаншалар мен гранатометтер, сондай-ақ гранаталар әлі де қылмыскерлердің қолында», - деді Бас прокурор «Жаңа Қазақстан» депутаттық тобының сауалына берген ауызша жауабында.
Оның айтуынша, мұндай арсеналмен тұтас полкті қаруландыруға болады.
«Бейбіт тұрғындарға бұл қару қажет емес екені түсінікті. Ол елдегі жағдайды ауқымды тұрақсыздандыру үшін ұрланған. Осы фактілердің бәрі бойынша қылмыстық істер тергелуде», - деді Берік Асылов.
906 рет оқылды
