Фото: ortcom.kz
Ұлттық құрылтай мүшесі, Ұлттық ғылым академиясының академигі, Академик Е.Букетов атындағы Қарағанды зерттеу университетінің ректоры, профессор Нұрлан Дулатбеков Бурабайда өтіп жатқан Ұлттық құрылтайда көтерілген мәселелерге қатысты пікір білдірді, деп хабарлайды Ult.kz."Қоғамның сан саласын қамтитын, әсіресе әлеуметтік сектор мен идеология жағына көбірек мән беретін Ұлттық құрылтай отырыстарында мен негізінен өзіме жақын білім мен ғылым саласының өзекті мәселелерін көтеріп келемін. Көңілге қонымдысы төрт рет өткен отырыстың ешқайсысында білім мен ғылым мәселелері шет қалған емес", -деген Н. Дулатбеков аталған салаға қатысты айтылған дүниелер өз нәтижесін бере бастады деп есептейді.
"Яғни біздің көптеген ұсынысымыз ескеріліп, жүзеге асырылып келеді. Атап айтсақ, ғылымды дамыту, оның қаржылық әлеуетін арттырып, бюджетін көтеру сынды мәселелер күн тәртібіне алынды. Құрылтайдың бір жақсы жері мұнда айтылған ой-пікірің бюрократиялық кедергілерге тап болмайды. Яғни осы жерде айтылған ұсыныстар хаттамаға енгізіліп, бірден министрліктерге жол тартады", -деді ол.
Сондай-ақ еліміз бойынша Ұлттық құрылтайға үш университеттің ректоры мүше. "Біз сол үш университеттің басшылары өзара ақылдаса отырып, экперттік топ құрып, жоғары оқу орындарының басты мәселелерін анықтап, ұстаз ғалымдардың пікірі негізінде ұсыныстар дайындаймыз" дейді.
"Міне, осындай бастамамыз өз нәтижесін беріп жатқаны қуантады. Яғни Арқалықтағы педагогикалық институт бұдан былай университет статусын алатыны үлкен жетістік болып отыр.
Бұдан бөлек, Президент айтып өткен өңірлік жоғары оқу орындарының ғылыми әлеуетін көтеру мақсатында технопарктер құру ісі де өз жүйесін тапты. Расында соңғы төрт жылда ғылым мен білімге көп көлемде қаржы бөліне бастады. Тіпті былтырғы қиыншылықтарға қарамастан ЖОО-ларға ғылым бағытында көрсетілген қолдау тоқтаған жоқ.
Десе де саладағы кемшіліктерді айта кеткен жөн. Әсіресе отыз жылдың ішінде университеттердің инфрақұрылымын ақсатып алдық. Даму былай тұрсын, құлдырай түсті. Жатақхана да, зертхана салу да жайына қалды. Енді-енді ғана бұл сала еңсе тіктеп, қаржылық қолдау көріп келеді. Олай болса бұдан былай мемлекет те бөлініп жатқан қаржының қайтарымын күтеді. Яғни ғылым мен білім де мемлекет дамуына қызмет ету қажет. Ғылымды коммерцияландыруды үдетіп, бизнеспен, кәсіпорындармен байланыс орнатып, олармен етене жақын жұмыс істеу сынды мақсаттарды қолға алу қажет-ақ", -дейді ол.
Сондай-ақ «Серпін» бағдарламасына да серпін берген жөн деп есептейті профессор. Яғни оның пікірінше жобаны тоқтатпай, дамыта түскен абзал. Кезінде бұл жобамен тек бакалавр ғана дайындап келсек, ендігі жерде магистранттарды, PhD докторларды дайындауды да қолға алуымыз қажет. Сонда орталықтан шалғай жатқан облыстарға үлкен қолдау жасар едік деп есептейді Ұлттық құрылтай мүшесі.
1060 рет оқылды
