Мәжіліс депутаты Ермұрат Бапи 2 сәуірде өткен Мәжіліс отырысында Қазақстан туына арабша жазу жазып суретке түскен никабтағы қыздардың ісіне қатысты ҚР Бас прокуроры Берік Асыловқа депутаттық сауал жолдады. Ол сауалында ту ұстаған төрт әйелдің артында тұрған күштерді, жалған туды дайындаушыларды, оны таратушыларды анықтап, мұндай қастандықтың жолын кесу үшін, ұйымдастырушыларға қатаң жаза қолдануы тиіс екенін айтты деп хабарлайды Ult.kz.
Ол ұлтымыздың қастерлі мұраларына, мыңдаған жылдық салт-дәстүрлерімізге шабуыл толастамай тұр деп есептейді.
Фото: Мәжіліс баспасөз қызметінен
"Мұнда біздің назарымызды аударған – көк тудағы араб қарпіндегі жазудың өте сапалы түрде, арнайы баспа құралымен таңбалануы. Демек, бұл – жай ғана тұрмыстық бұзақылық, әдепсіз шектен шығушылық қана емес. Бұл – біздің қоғамымызға, мемлекеттігімізге, ұлттық дәстүріміз бен бірегейлігімізге жасалған ашық және нақақ қарсылық", -дейді депутат Бапи.
Депутат елдің туын бүлдіру арқылы жат пиғылды дәріптемек болған бұл төрт қыз әлдебір арандатушы топтың құрбаны болуы мүмкін деп күдіктенеді.
"Олар жастық алаңғасырлықпен, әлде материалдық қызығушылықпен немесе діни сауатсыздықпен жасаған бұл өрескел заң бұзушылықтың тасасында тұрған әлдебір кереғар күштер бар сияқты", -деп Ермұрат Бапи: "Әкімшілік тұрғыдағы жазасын алған төрт қыздан бұрын, осы қылмысты әрекетті ұйымдастырушылар жазаға тартылуы тиіс", -деп есептейді.
Депутат осындай түр-түсі бұрмаланған Қазақстан туы Wildberries Russ маркетплейсінде 5000 мың теңгеден еркін және ашық саудада сатылып жатқанына алаңдаушылық білдіреді.
Сонымен қатар, Ермұрат Бапидың пікірінше бұл оқиғаның арандатушылық мазмұны мен мемлекеттік тудың бетінде қолданылған символиканың сипаты – оның алдын ала жоспарланғанын, әлдебір топтың нақақ ұйымдастырғанын көрсетеді.
"Бұған кім тапсырыс берді? Ұйымдастырушылардың мақсаты қандай? Бұл сұрақтарға құқық қорғау органдары нақты жауап беруі тиіс! Мұндай арандатушылықтың қайталануына жол бермеу үшін тергеу-тексеру шарасы жан-жақты жүргізілуі қажет", -деп айтқан депутат жауапты мекемелер келесі шараларды шұғыл қолға алу керек деді.
1. Қолданыстағы заңнамаға сәйкес, құқық қорғау органдары орын алған жағдайды жіті тексеріп, арандатушылыққа алданған төрт әйелдің артында тұрған күштерді, жалған туды дайындаушыларды, оны таратушыларды анықтап, мұндай қастандықтың жолын кесу үшін, ұйымдастырушыларға қатаң жаза қолдануы тиіс!
2. Бекітілген стандартқа сәйкес келмейтін, ресми сипаты бұрмаланған мемлекеттік рәмізді сатуға шығарған сауда орындарының басшылығын жауапқа тарту керек. Сатылып кеткен туларды жинап алып, жою қажет!
Сондай-ақ, тиісті заңнамаға мемлекеттілігімізді мансұқтайтын, қоғамды жікке бөлуді көздейтін тауарлар сатқан жекелеген маркетплейстерге қарсы санкция салуды көздейтін түзетулер әзірлеп, оны заң нормасына енгізу керек.
3. Мемлекет радикалды ағымдардың өрескел әрекеттеріне бақылауды күшейтіп, діни құндылықтарды бұрмалауға қарсы шараларды қатаңдату қажет. Ұлттық бірегейлікті қорғаудың жүйелі және жалпыға ортақ саясатын қалыптастыратын уақыт жетті!
5. Зайырлы білім беру жүйесін нығайтуды, орта мектептердегі дінтану сабақтарын ұлттық мұралар негізінде жүргізу бағдарламасы дайындалуы керек!
Сонымен қатар, тиісті уәкілетті мемлекеттік органдар ұлттық мәдениетті дамыту, дәстүрлі киім кию бастамаларын қолдау және жастар арасында кең көлемде түсіндіру жұмыстарын жүргізуі қажет.
52664 рет оқылды
