Құрамында полиция, әкімдік, Тауарлар мен қызметтердің сапасы мен қауіпсіздігін бақылау басқармасының өкілдері бар мобильді топ карантин режимін сақтамау фактісін анықтау үшін жұмыс істеп жатыр, деп хабарлайды "Ұлт ақпарат" Нұр-Сұлтан қалалық ПД баспасөз қызметіне сілтеме жасап.
Өткен түнде мобильді топ 150-ге жуық кәсіпкерлік субъектілеріндегі карантин шараларының сақталуын тексерді. Тексеру барысында карантин талаптарын бұзған 14 нысан анықталды.
Мәселен, Түркістан көшесіндегі «Opus One» рестобары сағат 20.00-ден кейін жұмыс істеуге тыйым салынғанына қарамастан, жұмысын жалғастырып, клиент қабылдаған.
Сағат 00: 33-те Қабанбай батыр даңғылы бойында орналасқан «Strong» компьютер клубы карантин шаралары мен әлеуметтік қашықты сақтамай, мекемеге желілік ойынды ойнауды ұнататын 70-тен астам клиентті кіргізіп, адамдардың өмірі мен денсаулығына қауіп төндірген.
Барлық тәртіп бұзушыларға қатысты жиналған материал әкімшілік іс қозғау үшін Тауарлар мен қызметтердің сапасы мен қауіпсіздігін бақылау басқармасына жіберілді.