ҚР Индустрия және инфрақұрылымдық даму министрі міндетін атқарушы Қайырбек Өскенбаев Қазақстандағы медициналық маска мен дезинфекциялық құрал өндірісін баяндады, деп хабарлайды "Ұлт ақпарат".
«Медициналық бетперделердің тәуліктік өндірісін 1 млн данаға жеткіздік. Атап айтқанда, күн сайын фармацевтикалық кәсіпорындар – 325 мың дана, тігін кәсіпорындары – 680 мың дана маска тігеді. Фармацевтикалық кәсіпорындар өнімі «СҚ-Фармация» ЖШС арқылы таратылады. Ал тігін кәсіпорындарының 680 мың масканы жергілікті әкімшіліктер өздері таратады», - деді Қ. Өскенбаев Орталық коммуникациялар қызметінде өткен брифингте.
Сондай-ақ, елімізде күн сайын 85 180 литрден астам дезинфекциялық құрал шығарылады.
«Қазіргі уақытта қоймаларда 158 380 литр дезинфекциялық құрал бар. Дәріхана желілерін, көшелер мен үй-жайларды дезинфекциялау үшін 65 109 литрі тиелген. Яғни, біздің ішкі зауыттарда дезинфекциялық құрал толық шығарылады. Қанша көлемде дезинфекциялық құрал керек болса, соншалықты шығаруға мүмкіндігіміз бар», - деді ведомство өкілі.
1121 рет оқылды
