Тоқаев былтыр Қазақстанның БРИКС елдерімен саудасы 45 миллиард доллардан асқанын атап өтті. Оның пікірінше, алдағы жылдары бұл көлемді ұлғайтуға мүмкіндіктер көп.
"Қазіргі әлем дағдарыста. Ол бұрын-соңды болмаған геосаяси және экономикалық тұрақсыздықпен бетпе-бет келіп отыр. Жаһандық азық-түлік жағдайы нашарлап барады. Егер жаһандық азық-түлікті жеткізу тізбегі нашарлай берсе, миллиондаған адамның өміріне қауіп төнеді", - деді Президент "БРИКС плюс" форматындағы жаһандық даму бойынша жоғары деңгейдегі диалогта сөйлеген сөзінде.
Қасым-Жомарт Тоқаев әлемдегі төрт ірі азық-түлік өндірушінің үшеуі БРИКС-ке мүше екенін, БРИКС елдеріндегі ауыл шаруашылығының жалпы ішкі өнімі әлемдік ЖІӨ-нің жартысынан астамы екенін атап өтті.
"Азық-түлік дағдарысын тиімді шешу толық келісілген халықаралық әрекетті қажет етеді және қысқа мерзімді де, ұзақ мерзімді де шараларды қамтуы керек. Қазақстан өзінің орасан зор ауыл шаруашылығы әлеуетін пайдалана отырып, бұл күш-жігерге үлес қосуға дайын.
Қаржылық жағдайдың нашарлауы үлкен қарызы бар елдерге, кәсіпкерлік пен отбасыларға ауыр қысым жасап жатыр. Тұрақты ақаулар жағдайында елдер мен компаниялар жаһандық жеткізу тізбегін қайта бағалауға мәжбүр.
Қазақстан Шығыс пен Батыс, Оңтүстік пен Солтүстік арасындағы өзіндік "буферлік нарық" рөлін атқара отырып, әділ үлесін қоса алады. Біз ұзақ мерзімді перспективада ашық, әділ, өзара байланысты және тұрақты жаһандық экономиканы сақтауымыз керек", - деп қосты Мемлекет басшысы.
Сонымен қатар, Президент Қазақстанның БРИКС елдерімен климаттың өзгеруі проблемасын шешу үшін техникалық көмек пен әлеуетті арттыру саласында тығыз ынтымақтастық орнатуға ниетті екенін айтты.
"Көпжақтылық пен жаһандық басқарудың экзистенциал дағдарысына қарамастан, Қазақстан халықаралық институттар кез келген елдің мүмкіндігінен тыс қауіп-қатерлерге қарсы тұрудың жалғыз құралы болып қала беретініне нық сенеді", - деді ол.
Тоқаев жаһандық серіктестіктің жаңа түрлері конфронтацияны алмастыруы керек деп санайды.
"Мен "Адамзат тағдырының ортақ қоғамдастығы" көзқарасын, сондай-ақ Си Цзиньпин бастаған жаһандық қауіпсіздік және жаһандық даму бастамасын жоғары бағалаймын.
Орталық Азияның локомотиві ретінде Қазақстан 2030 жылға дейінгі тұрақты даму күн тәртібіне қарай өңірлік ынтымақтастықты кеңейтуге ұмтылып жатыр. Біз Алматыда БҰҰ-ның Орталық Азия мен Ауғанстан үшін ТЖМ орталығын құру идеясын ілгерілетуді жалғастырамыз. БРИКС+ платформасы бұл іске лайықты үлес қосатынына сенімдімін. Қазақстан өзінің ұлттық мүдделерін жаһандық міндеттемелерге сәйкес келтіруге бел байлап отыр.
Бұл дағдарысты мүмкіндікке айналдыратын кез келді. Бұл жерде біздің барлық күш-жігеріміз адамдарды бірінші орынға қою - мораль императивін басшылыққа алуы керек. Біз "су-энергетика-азық-түлік қауіпсіздігі" қарым-қатынасына байланысты шиеленіскен аймақтық тәуекелдерді жоюымыз керек", - деді Мемлекет басшысы.
873 рет оқылды
