Фото:gov.kz
Бүгін Мемлекет басшысы Қасым-Жомарт Тоқаев Қазақстан халқына Жолдау жасады. Жолдауда президент бірқатар өзекті мәселелерді көтерді. Соның ішінде білім беру саласы да бар.
ULT.KZ тілшісі IUTH Университеті, “Туризм” мектебінің аға оқытушысы Нұржан Әбдіразақовтан жолдаудағы білім беру саласы туралы аспектілерге сараптамалық комментарий сұраған еді. Сұхбаттасымыз Президенттің мектепке дейінгі тәрбие туралы айтқан тұсына былай пікір білдірді:
«Президент мектепке дейінгі тәрбиенің маңыздылығына назар аударып, балаларды балабақшамен қамтамасыз ету мәселесін түпкілікті шешуді талап етті. Менің ойымша, бұл елдің болашағы үшін маңызды қадам, себебі балабақшаға бару балалардың дамуына, әлеуметтік дағдыларын қалыптастыруға үлкен әсер етеді. Сонымен қатар, тәрбиешілердің мәртебесін арттыру және олардың жалақысын көбейту қажеттілігі аса дұрыс бағыттағы шаралар деп есептеймін. Бұл мамандардың кәсіби деңгейін жоғарылатуға және білім беру сапасын арттыруға зор ықпал етеді деп ойлаймын», -деді ол тілшімізге.
Фото: Нұржан Әбдіразақов iuth.edu.kz
Айта кетейік, мемлекет басшысы жолдауда орта білім беру сапасы мен мектеп формасына қатысты мәселелерге тоқталған.
«Біз 2025 жылға дейін 800 мың баланың заманауи мектепте оқуына жағдай жасаймыз. Осылайша, апатты жағдайдағы және үш ауысыммен оқитын мектеп мәселесін толық шешеміз. Бұл ауыл және қала мектептерінің айырмашылығын едәуір азайтады», - деді Президент өз сөзінде.
Бұл туралы пікір білдірген Нұржан Әбдіразақов «Жайлы мектеп» ұлттық жобасының жүзеге асырылуы мектептердегі жағдайды жақсартуға бағытталған маңызды бастама деп санайтынын айтты.
«Бұл ауыл мен қала мектептерінің арасындағы айырмашылықты азайтуға көмектеседі және апатты жағдайдағы мектептердің мәселесін шешуге мүмкіндік береді деп есептеймін. Осылайша, барлық оқушылар үшін тең білім беру мүмкіндіктері қамтамасыз етіледі деп есептеймін. Ал мектеп формасын барлық оқушыға қолжетімді ету қажеттілігі – әлеуметтік әділеттілікті қамтамасыз ететін маңызды қадам деп есептеймін. Бұл отандық жеңіл өнеркәсіпті дамытуға да ықпал етеді, әрі әлеуметтік әлсіз топтағы балаларға қолдау көрсету арқылы олардың білім алудағы мүмкіндіктерін теңестіреді деп ойлаймын», -дейді сұхбаттасымыз.
Президент педагогикалық жоғары оқу орындарын аккредитациялаудың жаңа стандарттарын енгізуді және ұстаздардың құзырет аясын айқындауды тапсырды.
«Бұл білім беру сапасын көтеруге және мұғалімдердің кәсіби деңгейін нығайтуға бағытталған маңызды қадам деп санаймын», -дейді Нұржан Әбдіразақов.
«Қоғамда қазақ және орыс тілін мектепте оқыту мәселесі жөнінде пікірталас болып жатыр. Нақты айтайын: біз қазақ тілін де, орыс тілін де жақсы білетін балаларды тәрбиелеуіміз қажет. Себебі, бұл ұрпақтың мүддесі үшін керек. Оқу-ағарту министрлігі популистердің жетегінде кетпей, балалардың мүддесін қорғауға тиіс. Білімді және бірнеше тілді меңгерген ұрпақ болашаққа сеніммен қадам басады. Біздің күшіміз – жастардың білімінде», -деген болатын Қасым-Жомарт Тоқаев жолдауда.
Бұл туралы пікір білдірген Нұржан Әбдіразақов қазақ және орыс тілдерін қатар оқыту туралы пікірталастарға қатысты Президенттің ұстанымы – түрлі әлем тілдерін жоғары деңгейде меңгерген мультилингвист ұрпақ тәрбиелеу мақсаты деп ойлайды.
«Түрлі тілдерді меңгерген әрине дұрыс, бірақ, қазақ тілінің рөлі ең бірінші орынға қойылуы тиіс деп санаймын», -дейді ол.
Президент жолдауында техникалық және кәсіби білім беру мәселесіне де тоқталып өтті. Сұхбаттасымыздың ойымша, бұл сала еңбек нарығының сұранысына сай болуы тиіс.
«Президент техникалық және кәсіби білім беру жүйесін жаңа экономикалық бағыттармен сәйкестендіру қажеттігін атап өтті. Бұл қадам елдің экономикалық дамуына ықпал етеді және жастарды еңбек нарығына тиімді бейімдейді деп есептеймін», -дейді Нұржан Әбдіразақов.
Қорытындылай келе, IUTH Университеті, “Туризм” мектебінің аға оқытушысы Нұржан Әбдіразақов Президенттің жолдауында білім беру саласын дамытуға бағытталған көптеген маңызды бастамалар ұсынылғанын айтып отыр. Оның пікірінше бұл қадамдар елдің жарқын болашағына тиімді инвестиция ретінде қарастырылуы тиіс.
1006 рет оқылды
