04 мам, 2022 сағат 15:05

Бір млн теңгелік гауһартасты ұрлаған әйел ұсталды


Елордада белгісіз әйел дүкеннен құны 1 млн теңгеден асатын гауһар тасты ұрлап кетті, деп хабарлайды ҚазАқпарат.

Полицияға дүкен директоры арызданып, Ғабдуллин көшесіндегі зергерлік дүкенінен белгісіз біреу құны 1 млн теңгеден асатын гауһар тасты ұрлап кеткенін айтқан. 

«Жедел-іздестіру іс-шараларын жүргізу және қылмыс жасау периметрінде орнатылған бейнебақылау камераларын қарау барысында күдікті анықталды. Ол 49 жастағы қала тұрғыны болып шықты. Әйелдің зергерлік дүкенге жиі келетіні және бұрын бірнеше рет үлкен сомаға зат сатып алғандығы белгілі болды. Күдікті кешкі сағат 17.45-те зергерлік дүкенге кіріп, сатушының басқа клиенттерге қызмет көрсеткенін пайдаланып, қымбат жиынтықты ұрлап, қылмыс орнынан бой тасалаған», - деп жазды қалалық полиция департаментінің баспасөз қызметі.

Ұсталған азамат кінәсін мойындады, заттай айғақ тәркіленді. Аталған дерек бойынша «Ұрлық» бабымен сотқа дейінгі тергеу жүргізіліп, оның елорда аумағында жасалған басқа да ұқсас қылмыстарға қатыстылығы тексерілуде.