Жамбыл облысының экс-әкімі Бердібек Сапарбаев президентпен не үшін кездескенін айтты, деп хабарлайды Sputnik Қазақстан.
Бүгін Сапарбаев Нұр-Сұлтан қаласының №59 референдум учаскесінде дауыс берді.
Журналистер экс-әкімнен президентпен не үшін кездескенін сұрады.
"Менің Мемлекет басшысы Қасым-Жомарт Кемеұлына кірген мақсатым - ол кісінің берген тапсырмалары қалай орындалғанын және қандай жұмыстар жасалғанын айту. Одан кейін аз да болса, тәжірибеміз бар. Өзімнің ойыммен, пікіріммен бөлістім. Оны Мемлекет басшысы қабылдады", - деді Сапарбаев.
Сондай-ақ, әлеуметтік желіде "жаңа облысқа әкім болып бару мүмкін" деген болжамға қатысты пікір білдірді.
"Ондай әңгімелер көп. Ешқандай ұсыныс жоқ. Мен қазір үйде, бала-шағаммен отырмын. Қызметке шықарса... Егер менің тәжірибем, білімім Отаныма, халқыма керек болса, онда, әрине, халық үшін қызмет етуге дайынбыз", - деп атап өтті Сапарбаев.
784 рет оқылды
