Батыс Қазақстан облысында киіктер жол салушылар қазған траншеяға түсіп кетті, деп хабарлайды "Ұлт ақпарат".
Қазылған орға құлаған жануарлардың видеосы 15 қыркүйекте әлеуметтік желіде пайда болды. Кадрдан оннан астам киіктің шұңқырдан шыға алмай, ары-бері сабылып жүргенін көруге болады.
БҚО орман шаруашылығы және жануарлар дүниесі аумақтық инспекциясынан түскен мәліметке қарағанда, оқиға Жәнібек ауданында болған.
14 қыркүйек күні шамамен сағат 10.00-де «WhatsApp» желісі бойынша инспекция қызметкеріне видеотүсірілім келіп түскен. Онда шамамен 12-15 бас киіктің (негізінен текелері) тереңдігі 2,5-3 метр, ұзындығы 700-800 метр траншеяда жүргені бейнеленген.
Жәнібек ауданына инспекция қызметкері шұғыл аттанып, «Охотзоопром» ӨБ» РМҚК Батыс Қазақстан аймақтық филиалының инспекторларымен бірлесіп, оқиғаны анықтады.
Видеоны 11-12 қыркүйек күндері Казталов-Жәнібек автожолы бойында құрылыс-жөндеу жұмыстарын жүргізіп жатқан «Теміржол жөндеу» - «СпецСтройМонтаж» ЖШС филиалының қызметкерлері түсірген.
Киіктер аталған жолды кесіп өткен кезде қоршаудың жоқтығынан траншеяға түсіп кетіп, шыға алмаған. Содан кейін арнайы техниканың көмегімен топырақ себіліп, ақ бөкендер босатылған.
«Аталған аумақ Батыс Қазақстан облысындағы киіктердің көшіп-қонып жүретін жері болып есептеледі. Сондықтан «Теміржол жөндеу» - «СпецСтройМонтаж» ЖШС филиалы басшылығына алдағы уақытта мұндай жағдайға жол бермеу қажеттігі ескертілді», деп мәлімдеді БҚО орман шаруашылығы және жануарлар дүниесі аумақтық инспекциясы.
«Теміржол жөндеу - «СпецСтройМонтаж» ЖШС филиалының қызметкерлері аталған оқиғадан киіктерге залал келмегенін, арнайы техниканың көмегімен шығарып жібергенін растады.
781 рет оқылды
