01 мау, 2022 сағат 14:35

Сағынтаев жаңа қызметке тағайындалды

Алматының экс-әкімі Бақытжан Сағынтаев Еуразиялық экономикалық комиссия алқасының мүшесі (министрі) болып тағайындалды, - деп хабарлайды "Ұлт ақпарат".

Ұйымның сайтындағы мәлімет бойынша, Сағынтаевты ЕЭК Алқасының мүшесі етіп тағайындау туралы шешім 23 мамырда Мәскеуде шығарылған. Ол Руслан Бекетаевтың орнына келді. Сағынтаев Бекетаевты тағайындау кезінде белгіленген өкілеттіктің қалған мерзіміне тағайындалды.

Бақытжан Әбдірұлы 1963 жылы 13 қазанда Жамбыл облысының Үшарал ауылында дүниеге келген.

С.М.Киров атындағы Қазақ мемлекеттік университетінің философия-экономика факультетін бітірген.

1985 жылдан - Алматы халық шаруашылығы институтының саяси экономия кафедрасының меңгерушісі. 1988 жылдан С.М.Киров атындағы Қазақ мемлекеттік университетінің әлеуметтану кафедрасында ассистент, аға оқытушы, доцент.

1992 жылдан коммерциялық құрылымдарда басшылық жұмыстарда болды. 1998 жылдан - Жамбыл облысы әкімінің орынбасары.

1999 жылдан - ҚР шағын бизнесті қолдау агенттігі төрағасының орынбасары.

2000 жылдан - «Шағын кәсіпкерлікті дамыту қоры» ЖАҚ басқарма төрағасы. 2001 жылдан ҚР табиғи монополияларды реттеу, бәсекелестікті қорғау және шағын бизнесті қолдау агенттігі төрағасының бірінші орынбасары.

2004 жылдан - ҚР табиғи монополияларды реттеу агенттігінің төрағасы. 2007 жылдан - ҚР Премьер-министрі Кеңсесінің басшысы.

2008 жылдан - Павлодар облысының әкімі.

2012 жылғы қаңтардан қыркүйекке дейін - ҚР Экономикалық даму және сауда министрі.

2012-2013 жылдары - «Нұр Отан» ХДП төрағасының бірінші орынбасары қызметтерін атқарған. ҚР Премьер-Министрінің бірінші орынбасары (2013-2016); ҚР Премьер-Министрі (2016-2019); Қазақстан Республикасының Мемлекеттік хатшысы (2019-24.03.2019); Қазақстан Республикасы Президенті Әкімшілігінің басшысы (03.2019-06.2019).

2019-2022 жылдары Алматы қаласының әкімі.

Еске салсақ, 31 қаңтарда Мемлекет басшысының Жарлығымен Бақытжан Сағынтаев басқа жұмысқа ауысуына байланысты Алматы қаласының әкімі лауазымынан босатылған еді.