Ауғанстанның бұрынғы президенті Ашраф Ғани бір жыл бұрын "Талибан" қозғалысына (Қазақстанда тыйым салынған ұйым) ел президентін қорлауға жол бермеу үшін Ауғанстаннан қашып кеткенін түсіндірді, - деп хабарлайды Tengrinews.kz тілшісі South China Morning Post басылымына сілтеме жасап.
Ғанидің айтуынша, бастапқыда оның Ауғанстаннан кету жоспары болмаған.
"Мен тәліптер мен олардың жақтастарына Ауғанстан президентін қорлау және оны үкіметтің заңдылығына қол қоюға мәжбүрлеу рақатын бергім келмегендіктен кеттім", - деді ол.
Сонымен қатар, Ғани басқа шенеуніктермен бірге тікұшақтармен қашып бара жатқанда өзімен ондаған миллион доллар қолма-қол ақша алып кеткені туралы мәлімдемелерді де жоққа шығарды. Конгрестің бақылаушы ұйымы баяндамасында Ғани мен оның аға кеңесшілері тікұшақпен осынша ақшаны тасымалдауы екіталай екенін айтты.
"Олардың ұшуының асығыс сипаты, жүкке емес, жолаушыларға баса назар аудару, тікұшақтардың жүк көтергіштігі мен пайдалану сипаттамалары, сондай-ақ жердегі және ауадағы куәгерлердің егжей-тегжейлі әңгімелеріндегі дәйекті үйлесімділік - мұның бәрі тікұшақтардың бортында 500 000 доллардан аспайтын қолма-қол ақша болғанын көрсетеді", - деп жазады Ауғанстанды қалпына келтіру жөніндегі арнайы бас инспектор кеңсесі.
Еске салайық, 2021 жылдың 15 тамызында "Талибан" содырлары Кабулға кіріп, елдегі билікті басып алғанын жариялаған еді. Кейін Ауғанстан президенті Ашраф Ғани елден кетті.
778 рет оқылды
