Нұр-Сұлтан қаласында су тұтынушылардың қарызы 1 млрд 120 млн теңгені құрайды. Бұл туралы «Астана су арнасы» мекемесі экономикалық жоспарлау бөлімінің бас маманы Виталий Артамонов мәлім етті, деп хабарлайды ҚазАқпарат.
«Биыл 8 айдың қорытындысы бойынша тұтынушылардың суға қарызы 1 млрд 120 млн теңгені құрап отыр. Аталған соманың 159 млн теңгесі жеке тұлғалардың қарызы. Қалған берешек сомасы заңды тұлғаларға тиесілі. Ерекше тоқталып өтетін жайт, елордада заңды тұлғалар 963 млн теңге суға қарыз. Сол соманың 559 млн теңгесі неше жыл бұрын жабылып қалған немесе банкротқа ұшыраған мекемелерге тиесілі. Яғни берешек ұйымдар қызметін әлдеқайда тоқтатқан. Жоқ десек те болады. Осы орайда біз қалалық әкімдікке қызметі тоқтаған мекемелердің суға берешегін жою керектігін, яғни есептен шығаруды ұсындық», - деді Виталий Артамонов БАҚ өкілдеріне арналған баспасөз туры барысында.
Оның айтуынша, қызметі тоқтаған мекемелердің суға берешегі мәселесі бүгінде қалалық әкімдік деңгейінде қаралып жатыр.
Сондай-ақ, аталған мекеме өкілі елордада жылына 82 млн текше метр су қолданылатынын айтты.
775 рет оқылды
