Бала құқықтары жөніндегі уәкіл Аружан Саин қазақ тілді журналистерден кешірім сұрады, деп хабарлайды Sputnik Қазақстан.
Бүгін Орталық коммуникациялар қызметінде өткен баспасөз мәслихатында Аружан Саин өзінің алдағы жоспарын таныстырды. Жарты сағаттан астам уақыт сөйлеген уәкіл өз баяндамасын толығымен ресми тілде жасады. Осыдан кейін қазақ тілді журналистер оған ескерту жасап, мемлекеттік тілде сөйлеу керектігін жеткізді.
"Менің қазақ тілім әлі онша жақсы емес. Специфика жағынан... терминдерді пайдаланғанда маған қиын. Сіздермен жай сөйлесе аламын. Бірақ біздің мәселелеріміз туралы әлі айта алмаймын. Әрине, күн сайын қазақ тіліндегі мәтіндерді оқып, жаттап, сөйлеуге тырысамын. Бірақ кешіріңіз... болашақта. Біріншіден, уақыт керек оған. Қазір уақыт жоқ", - деді Саин.
Айта кетейік, бүгінгі брифингте Саин барлық интернатты жабуды ұсынды. Оның айтуынша, кәсіби фостерлік отбасылар болса, балалар үйлерін толығымен жауып тастауға болады.
"Қазақстанға шамамен 350-500 фостерлік отбасы қажет. Себебі жыл сайын 1 500 бала ата-анасының асырауынсыз қалып жатады. Сонда бір фостерлік отбасы 3-5 баланы алса, қазіргі интернат мәселесін толығымен шешуге болады", - дейді Саин.
2091 рет оқылды
