25 там, 2021 сағат 20:19

Алматыдағы Rixos қонақүйінің бас директорына айыппұл салынды

Алматының бас санитария дәрігері Rixos қонақүйінің бас директорына жаппай жиын өткізуге рұқсат бергені үшін айыппұл салынғанын айтты, - деп хабарлайды "Ұлт ақпарат".

Алматыда өткен брифинг кезінде қаланың бас санитария дәрігері Жандарбек Бекшин журналистің, "Rixos қонақүйінде еврейлер жиналыс өткізгені үшін қонақүй басшылығына неге айыппұл салынбады" деген сұрағына жауап берді.

"Қонақүйдің бас директоры демалыста болды, сондықтан оған хаттама жасай алмады. Осы аптада демалыстан оралған соң оған хаттама жасалды", - деді Бекшин.

Бекшиннің айтуынша, Rixos қонақүйінің бас директорына 230 АЕК (670 мың теңге) айыппұл салынған.

Айта кетейік, бұған дейін Алматы қаласының әкімі Бақытжан Сағынтаев Алматының бас санитария дәрігері Жандарбек Бекшинге сын айтқан болатын. Себебі, еврей қоғамдастығының жиыны өткен Rixos қонақүйіне айыппұл салынбаған. Әкімнің сынынан кейін Rixos қонақүйі әкімшілігіне 30 АЕК (87 510 теңге) айыппұл салынған болатын.