Фото: Pixabay.com
Бұл оқиға Наурызбай ауданында, Nef Uptown тұрғын үй кешенінде болды. Біздің мәліметіміз бойынша, қылмыскер тұрғын үй кешенінің аумағына өзін электрик ретінде таныстырып кірген. Содан кейін бір пәтерге еніп, үйде болған ерлі-зайыптыларға жауынгерлік тапаншадан оқ атқан. Бұл туралы ORDA телеграм арнасы хабарлайды.
Екеуі де ауыр жарақат алған: әйел кеуде тұсынан жараланып, қолы сынған; ал ер адам өте ауыр жағдайда. Ол бес сағаттық операциядан кейін ғана есін жиды. Ерлі-зайыптылар қазір ауруханада.
Тергеу болжамы бойынша шабуылдың мақсаты – тонау. Қылмыскер полиция келгенше қашып үлгерген, оны табу қиынға соғуы мүмкін. "Элиталық" деп жарнамаланған тұрғын үй кешенінде уәде етілген бейнебақылау камералары жоқ. Бұл туралы тұрғындар бұрыннан шағымданып келген.
Қылмыскер қарумен үйге оңай кіріп кеткеніне қарағанда, күзет қызметінің де сапасы күмән тудырады.
Қылмыстық іс қозғалды, тергеу жұмыстары басталды.
«Қылмысты ашуға бағытталған кешенді жедел-іздестіру іс-шаралары жүргізілуде», – деп хабарлады Алматы полициясы.
Зардап шеккен ерлі-зайыптылардың жасы шамамен қырықта. Ер адам сақтандыру компаниясында жұмыс істейді, ал әйелі балаларының спорттық мансабымен айналысады. Абырой болғанда, шабуыл кезінде балалар үйде болмаған.
Жоғарыда айтылғандардың барлығын қорыта келе, Алматыда қауіпті қылмыскер қарумен еркін жүр, және ол тонау үшін қаруын қолданудан тартынбайтыны анық.
106 рет оқылды_140_110.jpg)
