Алматыны қалың қар басты. Қаладан 2 240 текше метр қар шығарылды, деп хабарлайды ҚазАқпарат.
Алматыға 3-4 қараша күндері тоқтаусыз қар жауды. Қаладағы қардың қалындығы 8 см. Тау бөктеріндегі аудандарда – 10 см, таулы аудандарда 15 см-ге дейін жетті.
Көктайғақтың алдын алу үшін қар жауған кезден бастап жолдарға, қиылыстарға, жолайрықтарының кіреберістеріне, тау бөктеріне және таулы аймақтарға көктайғақтарға қарсы материалдар себілді.
«4 қарашадан 5 қарашаға қараған түні қар тазалау жұмыстарына 37 қар тиегіш, 36 самосвал, 9 автогрейдер және 236 жол жұмысшысы тартылды. Сыртқа барлығы 2240 текше метр қар шығарылды»,- делінген әкімдік таратқан хабарламада.
Аудандық әкімдіктер мен қала әкімдігінде қар тазалау жұмыстарын тәулік бойы бақылайтын кезекшілік ұйымдастырылды.
Алдағы екі күнде ауа температурасының төмендеуінің болжануына орай жылы киіну, жүргізушілер мен жаяу жүргіншілер көктайғақтың пайда болуына байланысты сақтық шараларын сақтаулары қажет.
820 рет оқылды
