Фото: Pexels.com
Алматы облысы Қарасай аудандық мәслихатының бұрынғы депутаты мемлекеттен ірі көлемде ақша жымқырып, қылмыстық кірістерді заңдастырғаны үшін айыпталып отыр, деп хабарлайды Ult.kz.
Тергеу мәліметтері бойынша, күдікті мемлекеттен субсидия алу мақсатында Алматы облысының ауыл шаруашылығы басқармасына жалған құжаттар ұсынған. Ол құны 947 миллион теңге болатын таңқурай көшеттерін сатып алу туралы құжаттарды жасап, нәтижесінде 474 миллион теңгенің 50%-ын заңсыз субсидия ретінде иемденген.
Күдікті бұл қаражаттарды жылыстату үшін 21 жеке кәсіпкермен жалған келісімшарттар жасасқан. Құжаттар бойынша көшеттерді орау, тиеу және түсіру жұмыстары жүргізілді деп көрсетілгенімен, іс жүзінде мұндай қызметтер орындалмаған. Осы арқылы 431 миллион теңге қолма-қол ақшаға айналдырылған.
Сонымен қатар, жымқырылған қаражаттарды заңдастыру үшін күдікті жұбайының атына бағалы қағаздармен операциялар жүргізіп, қосымша 89 миллион теңге қылмыстық кіріс тапқан. Бұл қаражатқа Алматы қаласынан екі бөлмелі пәтер және Toyota Highlander автокөлігін сатып алған.
Мемлекеттен жымқырылған 170 миллион теңге Қонаев қаласындағы казиноға жұмсалғаны анықталды. Қазіргі таңда күдіктінің мүлкіне:
- екі бөлмелі пәтерге,
- Toyota Highlander автокөлігіне,
- 50 миллион теңге ақшасына,
- құны 91 миллион теңге болатын бағалы қағаздарға тыйым салынды.
Сот шешімімен күдікті 2 айға қамауға алынды. Тергеу жалғасуда.
481 рет оқылды
