Ақтөбе әкімдігі «Екпе ал да көлік ұт» акциясы аясында ұтысқа көлік тікті. Науқан екі кезеңмен өтеді, деп хабарлайды "Ұлт ақпарат".
Науқан екі кезеңмен өтеді. 25-маусымнан 10-тамызға дейін және 11-тамыздан 25-қыркүйекке дейін. Оған 25-маусым мен 25-қыркүйек аралығында Ақтөбе облысының аумағында коронавирус індетіне қарсы кез келген екпенің бірінші компонентін алған адамдардың барлығы қатыса алады. Жеңімпаздар «AQTOBE» телеарнасының тікелей эфирінде кездейсоқ тәртіпте анықталады.
«Әр кезеңнің басты жүлдесі - 2021 жылы шыққан Chevrolet Cobalt маркалы автокөлігі. Сондай-ақ, смартфондар, планшеттер, спорттық велосипедтер, робот шаңсорғыштар мен смарт сағаттар сияқты жүлделер де ойнатылады. Науқан демеушілердің қаражатына өткізілмек. Науқанның толық ережелерімен aktobe.gov.kz. сайтында танысуға болады», - деп хабарлады өңірлік коммуникациялар қызметі.
