Ақтауда әйел адамды өлтіріп, 3 миллион теңгесін ұрлаған қылмыскер ұсталды, деп хабарлайды "Ұлт ақпарат" облыстық полиция департаментіне сілтеме жасап.
Департаменттің баспасөз қызметінің мәліметінше, қанды оқиғаны тергеп-тексеру барысында қаза тапқан әйелдің «Kaspi Gold» картасынан үш миллион теңге сомасындағы қаражаты жоғалғандығы анықталған.
Жедел-іздестіру шаралары барысында криминалдық полиция қызметкерлері Түпқараған ауданындағы Таушық ауылында күдіктіні анықтап, ұстады.
Ұсталған азамат кінәсін мойындады. Тінту кезінде полицейлер одан 2 миллион 500 мың теңге ақша қаражатын тәркіледі.
Күдікті Ақтау қаласы полиция басқармасының уақытша ұстау изоляторына қамалды.
Аталған факті бойынша Қазақстан Республикасы Қылмыстық кодексінің 99-бабы «Адам өлтіру» бойынша қылмыстық іс қозғалды.
Сот-медициналық сараптама тағайындалды.
Бұған дейін Ақтаудағы тұрғын үйлердің бірінен әйел адамның мәйіті табылғанын жазған едік.
1459 рет оқылды
